రూ.168 కోట్లతో పాఠశాలల్లో మౌలిక సదుపాయాలు

వి.ఎల్‌.పురం(రాజమహేంద్రవరం): జిల్లాలోని ప్రభుత్వ పాఠశాలల్లో రూ.168 కోట్లతో మౌలిక సదుపాయాలు కల్పించనున్నట్లు కలెక్టర్‌ కె.మాధవీలత తెలిపారు. విద్యాశాఖ ముఖ్య కార్యదర్శి బి.రాజశేఖర్‌ పాఠశాలల్లో నాడు-నేడు పనులపై గురువారం నిర్వహించిన దూరదృశ్య సమీక్ష సమావేశంలో కలెక్టరేట్‌ నుంచి కలెక్టర్‌, డీఈవో అబ్రహం, ఇతర అధికారులు పాల్గొన్నారు. అనంతరం కలెక్టర్‌ మాట్లాడుతూ మనబడి నాడు-నేడు కార్యక్రమంలో భాగంగా జిల్లాలో 442 పాఠశాలల్లో 811 అదనపు తరగతి గదులు, నీటివసతి, మరుగుదొడ్లు వంటి నిర్మాణాలు చేపట్టనున్నట్లు తెలిపారు. పది రోజుల్లో ప్రతి సచివాలయం పరిధిలో ఒక పని ప్రారంభించాలని జిల్లా అధికారులను ఆదేశించారు. ఆయా పాఠశాలల్లో చేపట్టే పనులను పేరెంట్స్‌ కమిటీ సమావేశంలో ఆమోదం పొందిన తర్వాత పేరెంట్స్‌ కమిటీ, ప్రధానోపాధ్యాయులు, ఇంజినీరింగ్‌ అధికారుల సమన్వయంతో చేపట్టాలన్నారు. అవసరమైతే మండల విద్యాశాఖాధికారిని నోడల్‌ అధికారిగా నియమించి పనులు జరిగే పాఠశాలల్లో ఇసుక, సిమెంట్‌, ఐరన్‌ తదితర మెటీరియల్‌ సక్రమంగా సరఫరా అయ్యేలా పర్యవేక్షించాలని ఆదేశించారు.