ధాన్యం డబ్బులు చెల్లించరూ..

తహసీల్దార్‌ ప్రసాద్‌కు వినతిపత్రం అందిస్తున్న రైతులు

అల్లవరం: రబీ సీజన్‌లో రైతుల నుంచి ప్రభుత్వం సేకరించిన ధాన్యానికి వెంటనే డబ్బులను వారి ఖాతాల్లో జమ చేయాలని రైతులు డిమాండ్‌ చేశారు. కొన్నేళ్లుగా ఖరీఫ్‌ పంట చేతికొచ్చే సయయంలో ముంపు బారినపడి రైతులకు నష్టాలే మిగులుతున్నాయని, దాంతో కనీసం పెట్టుబడి కూడా రాని పరిస్థితి నెలకొంటోందని వారు వాపోయారు. దీనికితోడు ప్రభుత్వ రబీ ధాన్యం సొమ్ము మూడు నెలలైనా ఇప్పటికీ చెల్లించకపోవడంతో పెట్టుబడికి అప్పులుతెచ్చినచోట వడ్డీలు పెరిగి రైతులపై మరింత భారం పడుతోందని ఆవేదన వ్యక్తం చేశారు. మురుగునీరు సక్రమంగా దిగేలా పూర్తిస్థాయిలో చర్యలు చేపట్టాలని, డ్రెయిన్ల ఆక్రమణలు తొలగించి ఆధునికీకరణ పనులు వెంటనే ప్రారంభించాలని డిమాండ్‌ చేశారు. అనంతరం తహసీల్దార్‌ ఎన్‌.ఎస్‌.ఎస్‌.ప్రసాద్‌కు వినతిపత్రం అందజేశారు. యాళ్ల బ్రహ్మానందం, పొలాశెట్టి భాస్కరరావు, అకుల లక్ష్మణరావు, కుడిపూడి అప్పారావు తదితరులు పాల్గొన్నారు.