డిసెంబరులో గృహ ప్రవేశాలకు ఏర్పాట్లు చేయాలి

సమీక్షిస్తున్న కలెక్టర్‌ కృతికాశుక్లా, హాజరైన అధికారులు

కాకినాడ కలెక్టరేట్‌: జిల్లాలోని జగనన్న కాలనీల్లో డిసెంబరు 21న పెద్ద సంఖ్యలో గృహ ప్రవేశాలకు సిద్ధం చేయాలని కలెక్టర్‌ కృతికాశుక్లా అధికారులను ఆదేశించారు. కలెక్టరేట్‌లో గృహనిర్మాణ సంస్థ, లే-ఔట్ల ప్రత్యేక అధికారులతో శుక్రవారం ఆమె సమీక్ష నిర్వహించారు. జిల్లాలోని ఏడు అసెంబ్లీ నియోజకవర్గాల పరిధిలోని అన్ని లే-ఔట్లలో పూర్తిస్థాయిలో మౌలిక సదుపాయాలు కల్పించాలన్నారు. అప్రోచ్‌, అంతర్గత రహదారులు, డ్రైనేజీ, విద్యుత్తు, తాగునీరు, స్వాగత ద్వారాలు త్వరగా ఏర్పాటు చేయాలని ఆదేశించారు. డిసెంబరు 21న ఎక్కువ ఇళ్లను ప్రారంభించాలని రాష్ట్ర ప్రభుత్వం ఆదేశించిందని, దీనికి అనుగుణంగా ఏర్పాట్లు చేయాలన్నారు. ఈ సమావేశంలో జేసీ ఇలక్కియ, హౌసింగ్‌ పీడీ సుధాకర్‌పట్నాయక్‌, సీపీవో త్రినాథ్‌, డ్వామా పీడీ వెంకటలక్ష్మి, పంచాయతీరాజ్‌ ఎస్‌ఈ శ్రీనివాసరావు, డీఎల్‌డీవోలు ప్రసాదరావు, నారాయణమూర్తి తదితరులు పాల్గొన్నారు.