26 నుంచి అన్నవరంలో కార్తికమాస ఉత్సవాలు

అన్నవరం, న్యూస్‌టుడే: ఈ నెల 26 నుంచి నవంబరు 23 వరకు పవిత్ర కార్తికమాసంలో అన్నవరం దేవస్థానంలో పలు ఉత్సవాలు నిర్వహించేందుకు అధికారులు ఏర్పాట్లు చేస్తున్నారు. ఇందుకు సంబంధించిన కరపత్రాన్ని ఆదివారం విడుదల చేశారు. ఈ నెల 21  నుంచి భక్తులు సత్యదీక్షలు చేపట్టనున్నారు. వారికి దేవస్థానం నుంచి ఏర్పాట్లు చేస్తున్నారు. దీక్షా వస్త్రాలు అందించనున్నారు.

* ఈ నెల 26న అనివేటి మండపంలో ఆకాశ దీపం ప్రారంభిస్తారు.

* నవంబరు 5న క్షీరాబ్ది ద్వాదశి సందర్భంగా ఉదయం 8 గంటలకు గ్రామంలోని సుబ్బరాయపురం నుంచి ‘సత్యజ్యోతి’ ఊరేగింపు ప్రారంభమవుతుంది. రత్నగిరిపై కళామందిరం వద్దకు తీసుకువస్తారు. సాయంత్రం 4 గంటలకు స్వామి, అమ్మవార్ల ఉత్సవమూర్తులను కొండపై నుంచి కొండ దిగువున పంపా సరోవరం వద్దకు తీసుకువచ్చి తులసీదాత్రి పూజ నిర్వహిస్తారు. అనంతరం సాయంత్రం 6.30 గంటలకు తెప్పోత్సవం ప్రారంభమవుతుంది.

* నవంబరు 7న సాయంత్రం 6.30 గంటలకు కొండ దిగువున పంపా సరోవరం చెంతన పంపాహారతులు ప్రారంభిస్తారు. రాత్రి 7.30 గంటలకు తొలిపావంచాల వద్ద జ్వాలాతోరణం కార్యక్రమం ఉంటుంది.

* నవంబరు 8న కార్తిక పౌర్ణమి సందర్భంగా ఉదయం 6 గంటలకు గిరి ప్రదక్షిణ ప్రారంభిస్తారు. 9.30 గంటలకు గిరి ప్రదక్షిణ ముగించనున్నారు. అదే రోజు చంద్రగ్రహణం సందర్భంగా ఉదయం 11 గంటలకు ఆలయ ద్వారాలు మూసివేస్తారు. ఈ నేపథ్యంలో ఉదయం 10.30 గంటలకే వ్రతాలు, ఇతర పూజా కార్యక్రమాలు ముగించనున్నారు. 9వ తేదీ తెల్లవారుజాము నుంచి దర్శనాలు యథావిధిగా ప్రారంభిస్తారు.

* నవంబరు 16న సత్యదీక్ష చేపట్టిన భక్తులచే సాయంత్రం 6 గంటలకు పడి పూజ నిర్వహిస్తారు. 17న ఉదయం దీక్షా విరమణ ఉంటుంది.

* నవంబరు 22న రత్నగిరిపై అనివేటి మండపంలో జ్యోతిర్లింగార్చన ఉంటుంది.