logo

ప్రాణం తీసిన ఆటవిడుపు

 పశ్చిమగోదావరి జిల్లా తణుకు పట్టణంలో ఆదివారం మధ్యాహ్నం ముగ్గురు యువకులు నిర్లక్ష్యంగా కారు నడుపుతూ బీభత్సం సృష్టించారు. స్వీయ చిత్రాలు తీసుకుంటూ నడపడంతో కారు జనాలపైకి దూసుకెళ్లింది. ఈ ప్రమాదంలో ఒకరు మృతి చెందగా తండ్రి, కుమార్తెకు తీవ్ర గాయాలయ్యాయి.

Published : 03 Oct 2022 05:47 IST

వీరబాబు (పాత చిత్రం)

తణుకు:  పశ్చిమగోదావరి జిల్లా తణుకు పట్టణంలో ఆదివారం మధ్యాహ్నం ముగ్గురు యువకులు నిర్లక్ష్యంగా కారు నడుపుతూ బీభత్సం సృష్టించారు. స్వీయ చిత్రాలు తీసుకుంటూ నడపడంతో కారు జనాలపైకి దూసుకెళ్లింది. ఈ ప్రమాదంలో ఒకరు మృతి చెందగా తండ్రి, కుమార్తెకు తీవ్ర గాయాలయ్యాయి. పోలీసులు, స్థానికులు తెలిపిన వివరాలు.. తణుకు పట్టణానికి చెందిన కోడి గుడ్లు ఎగుమతి చేసే ట్రేడర్‌ సబీర్‌ హుస్సేన్‌కు చెందిన కారులో అతని కుమారుడు సయ్యన్‌ హుస్సేన్‌, స్నేహితులు వడ్డి సాయిపవన్‌ ఫణేంద్ర (తాడేపల్లిగూడెం), ఆముదాలపల్లి శశికిరణ్‌ (వేల్పూరు) చరవాణుల్లో స్వీయ చిత్రాలు తీసుకుంటూ కారు నడుపుతున్నారు. సొసైటీ రోడ్డులో శశి స్కూల్‌ సమీ పాన అదుపు తప్పిన కారు జనాలపైకి దూసుకెళ్లి,  వైఎస్సార్‌ పార్కు గోడను ఢీ కొని ఆగింది ఈ ప్రమాదంలో కొత్తపేట మండలం పలివెల గ్రామానికి చెందిన నంబూరి వీరబాబు (65), హౌసింగ్‌ బోర్డు కాలనీలో అపార్ట్‌మెంట్‌ వద్ద వాచ్‌మ్యాన్‌గా పని చేస్తున్న శీల శ్రీను, ఆయన కుమార్తె శీల నాగసత్యదుర్గాభవానిలు తీవ్రంగా గాయపడ్డారు. వీరిని 108లో పట్టణంలోని ఓ ప్రైవేట్‌ ఆసుపత్రికి తరలించగా.. వీరబాబు చికిత్స పొందుతూ మృతి చెందారు. శ్రీను, భవానీలు చికిత్స పొందుతున్నారు. ప్రమాద సమయంలో  సయ్యన్‌ హుస్సేన్‌ కారు నడుపుతున్నాడని స్థానికులు చెప్పారు.

పూజలు చేయడానికి వచ్చి.. పలివెల గ్రామానికి చెందిన వీరబాబు కుటుంబ సభ్యులు, కొంత మంది బంధువులతో కలసి ఆదివారం ఉదయం వీరభద్రస్వామికి పూజలు నిర్వహించడానికి తణుకు వచ్చారు. ఈ క్రమంలో భాగంగా పానకాల కావిడిని మోయడానికి పట్టణానికి చెందిన శీల శ్రీనును పురమాయించుకున్నారు. అతను పానకాల కావిడితో నడుస్తుండగా... ఆయన కుమార్తె నాగసత్యదుర్గాభవాని తండ్రిని అనుసరిస్తున్నారు. ఈ సమయంలో వేగంగా వెనుక నుంచి కారు వీరిపైకి దూసుకొచ్చింది. ప్రమాదం జరిగిన వెంటనే ఎయిర్‌ బెలూన్లు తెరుచుకోవడంతో కారులో ప్రయాణిస్తున్న ముగ్గురు యువకులు సురక్షితంగా బయటపడ్డారు. సయ్యన్‌ హుస్సేన్‌ అక్కడ నుంచి పరారు కాగా సాయిపవన్‌ ఫణీంద్ర, శశికిరణ్‌లను పోలీసులు అదుపులోకి తీసుకున్నారు.

Read latest East godavari News and Telugu News

Follow us on Facebook, Twitter, Instagram & Google News.

Tags :

గమనిక: ఈనాడు.నెట్‌లో కనిపించే వ్యాపార ప్రకటనలు వివిధ దేశాల్లోని వ్యాపారస్తులు, సంస్థల నుంచి వస్తాయి. కొన్ని ప్రకటనలు పాఠకుల అభిరుచిననుసరించి కృత్రిమ మేధస్సుతో పంపబడతాయి. పాఠకులు తగిన జాగ్రత్త వహించి, ఉత్పత్తులు లేదా సేవల గురించి సముచిత విచారణ చేసి కొనుగోలు చేయాలి. ఆయా ఉత్పత్తులు / సేవల నాణ్యత లేదా లోపాలకు ఈనాడు యాజమాన్యం బాధ్యత వహించదు. ఈ విషయంలో ఉత్తర ప్రత్యుత్తరాలకి తావు లేదు.


మరిన్ని

ap-districts
ts-districts