బడ్డీ కొట్టులోకి దూసుకెళ్లిన కారు

కె.పెదపూడిలో అదుపుతప్పిన కారు

అంబాజీపేట: అంబాజీపేట మండలం కె.పెదపూడి వద్ద ఆదివారం జరిగిన రోడ్డు ప్రమాదంలో ముగ్గురికి గాయాలయ్యాయి.  స్థానికంగా నిర్వహిస్తున్న  బడ్డీకొట్టు హోటల్‌లోకి కారు దూసుకెళ్లింది. యానాంకు చెందిన కారు కె.పెదపూడి నుంచి అంబాజీపేట వైపు వస్తున్న సమయంలో అంబాజీపేట - అమలాపురం ప్రధాన రహదారిపై వెళ్తున్న ఓ మోటార్‌సైకిలిస్టును కారు ఢీ కొంది. ఆ పక్కనే ఉన్న నార్గని స్వామికి చెందిన బడ్డీ చిన్న హోటల్‌లోకి దూసుకుపోయింది. ఈ ఘటనలో కె.పెదపూడి గ్రామానికి చెందిన తిరుమనాథం నాయుడు ద్విచక్రవాహనం ధ్వంసమయ్యింది. అతనికి తీవ్రగాయాలు అయ్యాయి. అమలాపురంలోని ఓ ఆసుపత్రికి అతడ్ని చికిత్స నిమిత్తం తరలించారు. బడ్డీకొట్టులో ఉన్న నార్గని స్వామి భార్య వెంకటలక్ష్మి, అతని కుమార్తె గౌరీలకు గాయాలయ్యాయి. ఒక్కసారిగా కారు వేగంగా రావడంతో బడ్డీకొట్టుకు ఉన్న చెక్క అడ్డంగా ఉండటంతో పెనుప్రమాదం నుంచి వీరు బయటపడ్డారని ప్రత్యక్షసాక్షులు వెల్లడించారు. ఈ ప్రమాదంలో బడ్డీకొట్టు హోటల్‌లో ఉన్న సామగ్రి పూర్తిగా ధ్వంసమైంది.