విజయీభవ!

ఈనాడు డిజిటల్‌, ఏలూరు

పాదయాత్రపై పూలుచల్లుతూ..

జై అమరావతి నినాదాలతో రైౖతుల మహాపాదయాత్ర మంగళవారం తూర్పుగోదావరి జిల్లా ప్రకాశరావుపాలెం నుంచి పశ్చిమ గోదావరి జిల్లాలోకి ప్రవేశించింది. ప్రకాశరావుపాలెం నుంచి యాత్ర రామన్నగూడెం, పెదతాడేపల్లి, తాడేపల్లిగూడెం మీదుగా పెంటపాడు వరకు 15 కి.మీ మేర యాత్ర సాగింది. ఉదయం 9 గంటలకు స్వామి రథానికి రైతులు పూజలు చేశారు. గుమ్మడికాయలతో దిష్టితీసి శంఖం పూరించి పాదయాత్రను మొదలుపెట్టారు. యాత్ర ఆసాంతం కోలాహలంగా సాగింది. పెద్దతాడేపల్లి, తాడేపల్లిగూడెంలో పెద్ద ఎత్తున ప్రజలు వచ్చారు. రైతులపై పూలవర్షం కురిపించి హారతులిస్తూ ఆహ్వానించారు. రైతులు, కూలీలు, మహిళలతో పాటు వృద్ధులు, చిన్నారులు, యువకులు ఇలా అన్ని వయసులవారు భారీగా హాజరయ్యారు.  ప్రతి గ్రామంలో అమరావతి రైతులకు స్వాగతం పలుకుతూ ఫ్లెక్సీలు ఏర్పాటు చేశారు. తెదేపా, జనసేన, భాజపా, కాంగ్రెస్‌, సీపీఐ తదితర పార్టీలు వారి కార్యకర్తలతో యాత్రలో పాల్గొని సంఘీభావం ప్రకటించాయి.  రాజధాని ఆవశ్యకతను ప్రజలకు తెలిపేందుకు అమరావతి ఐకాస ఆధ్వర్యంలో ముద్రించిన కరపత్రాలను పంపిణీ చేస్తున్నారు. దారిపొడవునా పాదయాత్రికులకు గ్రామస్థులు మజ్జిగ, తాగునీరు సరఫరా చేశారు.