గౌతమి పాత వారధి పునఃప్రారంభం నేడు

సిద్ధమైన వారధి

ఆలమూరు, న్యూస్‌టుడే: జొన్నాడ - రావులపాలెం హైవే ట్రాఫిక్‌ కష్టాలకు ఈ దసరాతో తెరపడనుంది. గౌతమి పాత వంతెనపై రాకపోకలు బుధవారం నుంచి పున:ప్రారంభం కానున్నాయని హైవే ప్రాజెక్ట్‌ డైరెక్టర్‌ డి. సురేంద్రనాథ్‌, హైవే ప్రాజెక్ట్‌ మేనేజర్‌ కె.బాలసుబ్రహ్మణ్యం మంగళవారం వెల్లడించారు. పాత వంతెన మరమ్మతు పనులను గతేడాది ఏప్రిల్‌ చేపట్టారు. ట్రాఫిక్‌ వల్ల పనులకు అంతరాయం ఏర్పడుతున్నందున డిసెంబర్‌ నుంచి పాత వంతెనపై వాహనాల రాకపోకలను పూర్తిగా నిలిపేశారు. అప్పటి నుంచి తూర్పువైపు వారధిపైనే రాకపోకలు కొనసాగుతున్నాయి. ఎట్టకేలకు అధికారులు వాహనాల రాకపోకలను పాత వారధిపై ప్రారంభిస్తామని చెప్పడంతో వాహనదారులు హర్షం వ్యక్తం చేస్తున్నారు.