Chinarajappa: తెదేపా-జనసేన కలయికతో వైకాపాలో వణుకు: చినరాజప్ప

పాదయాత్రలో చినరాజప్ప

మండపేట: తెదేపా, జనసేన కలయికతో వైకాపా ఎమ్మెల్యేలు, మంత్రుల్లో వణుకు మొదలైందని పెద్దాపురం ఎమ్మెల్యే చినరాజప్ప పేర్కొన్నారు. మండపేట మండలంలో అమరావతి రైతుల పాదయాత్రకు సంఘీభావం తెలిపిన అనంతరం ఆయన మీడియాతో మాట్లాడారు. స్వశక్తితో ఎదిగి రాజకీయాల్లోకి వచ్చిన పవన్‌ కల్యాణ్‌ను, నీతి నిజాయతీతో ఉన్న చంద్రబాబును విమర్శిస్తున్న వైకాపా నాయకులు తామేంటో తెలుసుకోవాలన్నారు. ప్యాకేజీలకు, అవినీతికి బ్రాండ్‌ అంబాసిడర్‌ జగన్‌ అని అందరికీ తెలుసనీ.. 11 కేసుల్లో ఏ-1 ముద్దాయిగా ఉండి.. దొరికిన కాడికి దోచుకున్నది జగనే అన్నారు. ఇప్పటికే ప్రజల్లో తిరుగుబాటు మొదలైందనీ.. మొన్న విశాఖలో కొట్టారు... ప్రజల్లో తిరుగుబాటు వచ్చి తరిమికొట్టే రోజులు దగ్గర్లోనే ఉన్నాయని పేర్కొన్నారు. వైకాపా పాలనలో రాష్ట్రం అప్పులపాలై సర్వ నాశనమై. ప్రజలు ఇబ్బందులు పడుతున్నారని వివరించారు. ఎవరు పోరాడినా కేసులుపెడుతున్న ఈ ప్రభుత్వంపై... కలిసిపోరాడాల్సిన సమయం ఆసన్నమైందనీ..  అన్ని పార్టీలూ ఏకం కావడానికి జగన్‌ వేధింపులే కారణమని అన్నారు.