కాజ్‌వే పునరుద్ధరణకు రూ.6 లక్షల మంజూరు

ఈనాడు కథనానికి స్పందన

కాకినాడ కలెక్టరేట్‌:  సామర్లకోట మండలం, వెంకటకృష్ణరాయపురం పరిధిలోని కాజ్‌వే పునరుద్ధరణకు రూ.6 లక్షలు మంజూరు చేసినట్లు సంయుక్త కలెక్టర్‌ ఇలక్కియ తెలిపారు. ఈ నెల 23న ‘ఆవరించిన ముసురు’ శీర్షికతో ‘ఈనాడు’లో ప్రచురించిన కథనానికి జిల్లా యంత్రాంగం స్పందించింది. సుమారు 1,000 ఎకరాల్లో పండిన ధాన్యాన్ని బయటకు తీసుకురావడానికి ఉన్న ఏకైక మార్గం కొట్టుకుపోవడంతో రైతులు తీవ్ర ఇబ్బందులు పడుతున్నారు. ఇక్కడ మరో ఇరుకు వంతెన ఉన్నప్పటికీ ఆటోలు మాత్రమే వెళ్లే అవకాశం ఉంది. ఈ నేపథ్యంలో ధాన్యం తరలింపునకు రైతులు తీవ్ర ఇబ్బందులు పడుతున్నారు. ఇదే విషయాన్ని శనివారం కలెక్టరేట్‌లో జరిగిన జిల్లా సాగునీటి సలహా మండలి సమావేశంలో పెద్దాపురం ఎమ్మెల్యే నిమ్మకాయల చినరాజప్ప అధికారుల దృష్టికి తీసుకువచ్చారు. కాజ్‌వే స్థానంలో శాశ్వత ప్రాతిపదికన వంతెన నిర్మించాలని కోరారు. దీన్ని పరిశీలిస్తామని కలెక్టర్‌ చెప్పారు.