ఎయిడ్స్‌ మహమ్మారిని అంతం చేయాలి

మాట్లాడుతున్న కలెక్టర్‌ కృతికాశుక్లా, వేదికపై ఎస్పీ రవీంద్రనాథ్‌బాబు, కుడా ఛైర్‌పర్సన్‌ చంద్రకళాదీప్తి

కాకినాడ కలెక్టరేట్‌, న్యూస్‌టుడే: సంకోచాలు వీడి సమష్టిగా ఎయిడ్స్‌ మహమ్మారిని అంతం చేయాలని కలెక్టర్‌ కృతికాశుక్లా పిలుపునిచ్చారు. ప్రపంచ ఎయిడ్స్‌ నివారణ దినం సందర్భంగా గురువారం కలెక్టరేట్‌లో ఆమె అధ్యక్షతన ప్రత్యేక కార్యక్రమాన్ని నిర్వహించారు. ఎయిడ్స్‌ బాధిత చిన్నారులతో కలెక్టర్‌, ఎస్పీ రవీంద్రనాథ్‌బాబు, కుడా ఛైర్‌పర్సన్‌ రాగిరెడ్డి చంద్రకళాదీప్తి, అసిస్టెంట్‌ కలెక్టర్‌ ప్రఖర్‌జైన్‌, వివిధ కార్పొరేట్‌, స్వచ్ఛంద సంస్థల ప్రతినిధులు మధ్యాహ్న భోజనం చేశారు. ఓఎన్జీసీ, రిలయన్స్‌, భీమాబాయి మహిళా మండలి సమకూర్చిన పౌష్టికాహార కిట్లను బాధిత చిన్నారులకు అందజేశారు. కళాశాల విద్యార్థులకు నిర్వహించిన పోటీల్లో విజేతలకు బహుమతులు అందజేశారు. ఎయిడ్స్‌ నివారణలో విశేష సేవలందించిన అధికారులు, సిబ్బంది, స్వచ్ఛంద సంస్థల ప్రతినిధులను సత్కరించారు. కార్యక్రమంలో జడ్పీ సీఈవో ఎన్‌వీవీ సత్యనారాయణ, డీఎంహెచ్‌వో ఎం.శాంతిప్రభ పాల్గొన్నారు. కాకినాడకు చెందిన సోల్‌మేట్స్‌ అనే బృందం రూ.1.35 లక్షల చెక్కును కలెక్టర్‌కు అందజేశారు.