రిటైర్డ్‌ పోలీసు ఇన్‌స్పెక్టర్‌కు మూడేళ్ల జైలు

శ్యామలాసెంటర్‌ (రాజమహేంద్రవరం): ఆదాయానికి మించి ఆస్తుల కేసు విషయంలో స్పెషల్‌ బ్రాంచ్‌(ఎస్‌బీ) రిటైర్డ్‌ పోలీసు ఇన్‌స్పెక్టర్‌ ఎం.వెంకటేశ్వరరావుకు మూడు సంవత్సరాల కఠిన కారాగార శిక్ష, రూ.5 లక్షల జరిమానా, అది చెల్లించకుంటే మరో ఆరు నెలలపాటు సాధారణ జైలు శిక్ష విధిస్తూ రాజమహేంద్రవరం అవినీతి నిరోధకశాఖ కోర్టు సోమవారం తీర్పు ఇచ్చింది. విశాఖపట్నం పోలీసు కమిషనరేట్‌లోని ఎస్‌బీ ఇన్‌స్పెక్టర్‌గా 1996లో పనిచేసిన వెంకటేశ్వరరావు ఆదాయానికి మించి ఆస్తులు కూడబెట్టారనే ప్రాథమిక సమాచారంతో రాజమహేంద్రవరం ఏసీబీ అధికారులు అప్పట్లో కేసు నమోదుచేసి సోదాలు చేశారు. ఈ క్రమంలో నేరం రుజువు కావటంతో ఏసీబీ కోర్టు పై విధంగా తీర్పునిచ్చింది. సోదాల్లో అక్రమంగా కూడబెట్టిన తొమ్మిది రకాల ఆస్తులను ప్రభుత్వపరం చేస్తున్నట్లు తీర్పులో వెల్లడించారు. ఈ కేసును ఏసీబీ కోర్టులో పి.పి.శేషయ్య వాదించగా ఏసీబీ అదనపు సూపరింటెండెంట్‌ ఆఫ్‌ పోలీస్‌ సీహెచ్‌ సౌజన్య పర్యవేక్షించారు.