Andhra News: కాకినాడ జిల్లాలో దంపతులు అదృశ్యం.. క్వారీ వద్ద కనిపించిన మృతదేహం!

రౌతులపూడి : కాకినాడ జిల్లా రౌతులపూడి ఎస్‌ పైడిపాల శివారులో అదే గ్రామానికి చెందిన దంపతులు పోలోజు వరహాలు, లక్ష్మీ దుర్గా భవాని బుధవారం సాయంత్రం నుంచి అదృశ్యమయ్యారు. రోజూ వీరిద్దరూ గ్రామానికి సమీపంలోని క్వారీ వద్దకు బహిర్భూమికి వెళ్లేవారు. ఈ క్రమంలో బుధవారం సాయంత్రం ఇంటి నుంచి వెళ్లిన వీరు ఎంత సేపటికీ తిరిగి రాలేదు. దీంతో వారి బంధువులు ఆందోళనకు గురై క్వారీ వద్ద ఇవాళ గాలించగా ద్విచక్ర వాహనం కనిపించింది. పేలిన బండరాళ్ల వద్ద ఒకరి మృతదేహం కనిపించింది. మరొకరి కోసం గాలిస్తున్నారు. పేలుడు సంభవించిన క్వారీ చాలా రోజులుగా మూసివేసి ఉంది. బుధవారం క్వారీ తెరిచిన నిర్వాహకులు పేలుళ్లు జరపగా.. అటుగా వెళ్లిన దంపతులు ప్రమాదం బారిన పడినట్లు తెలుస్తోంది. కనిపించిన మృతదేహం ఎవరిదనే దానిపై స్పష్టత రావాల్సి ఉంది.