ఉపకార వేతనమని.. ఊడ్చేశాడు..

కాట్రేనికోన: గుర్తుతెలియని వ్యక్తి గ్రామ వాలంటీరును అడ్డం పెట్టుకుని ఓ విద్యార్థికి ఫోన్‌ చేసి రూ.18 వేలు కాజేసిన ఘటన ఇది. బాధితుడి వివరాల ప్రకారం.. కాట్రేనికోన మండలంలోని పెనుమల్లకు చెందిన బడుగు దినేష్‌కుమార్‌ డిగ్రీ తృతీయ సంవత్సరం చదువుతున్నాడు. ఇతనికి ఒక ఏడాదికే ప్రభుత్వ ఉపకార వేతనం వచ్చింది. ఈ నెల 20న ఓ గుర్తుతెలియని వ్యక్తి తాను ఉన్నతాధికారినని 88087 25363 నంబరు నుంచి ఫోన్‌ చేశాడు. గ్రామ వాలంటీరును కాన్ఫరెన్స్‌లోకి తీసుకుని ఉపకార వేతనం రాని విషయంపై ఆరా తీశాడు. ఫోన్‌పే ద్వారా కొంత మొత్తం చెల్లిస్తే.. ఆ నగదుతోపాటు స్కాలర్‌షిప్‌ మొత్తం వస్తుందనగా.. విడతల వారీగా రూ.18,833 చెల్లించాడు. ఆ తర్వాత అవతలి వ్యక్తి నంబరుకు ఫోన్‌ చేయగా కలవలేదు. వాలంటీరుకు తెలిపినా ఆమె స్పందించలేదు. గుర్తుతెలియని వ్యక్తి, గ్రామ వాలంటీరు కలసి తనను మోసంచేసి నగదు కాజేశారని దినేష్‌కుమార్‌ కాట్రేనికోన పోలీసుస్టేషను, ఎంపీడీవో కార్యాలయంలో ఫిర్యాదు చేశాడు. ఈ మోసంపై ఎంపీడీవో కామేశ్వరరావు మాట్లాడుతూ ఆ వ్యక్తి తాను ఈడీనని అనడంతో వాలంటీరు నమ్మారని, విషయం పోలీసులకు తెలిపానన్నారు. ఇలాంటివి నమ్మి ఎవరూ మోసపోవద్దని కోరారు.