‘పరీక్ష పే చర్చ’లో కరప గురుకుల విద్యార్థి

న్యూదిల్లీలో ప్రధాని మోదీతో ఇస్సాకు

కరప, న్యూస్‌టుడే: పరీక్షల ముందు విద్యార్థుల్లో ఒత్తిడి, భయాన్ని పోగొట్టేందుకు ప్రధాని మోదీ ఏటా నిర్వహిస్తున్న ‘పరీక్షా పే చర్చ’ మంచి ఫలితానిస్తోందని సమగ్ర శిక్ష ఏఎంవో ఎం.రామారెడ్డి తెలిపారు. దిల్లీ నుంచి నిర్వహిస్తున్న ఈ కార్యక్రమానికి కరపలోని మహాత్మా జ్యోతీబాఫులె వెనుకబడిన తరగతుల గురుకుల 10వ తరగతి విద్యార్థి టి.ఇస్సాకు హాజరై ప్రధానితో కలిసే అవకాశాన్ని దక్కించుకున్నాడు. రాష్ట్రం నుంచి ఇద్దరు ఎంపికవగా ఇస్సాకు ఒకడని పాఠశాల ప్రిన్సిపల్‌ కె.వి.రామకృష్ణారావు తెలిపారు. ఈ కార్యక్రమాన్ని ఆ పాఠశాలలో విద్యార్థులతో కలిసి ఎంఈవో బులి కృష్ణవేణి వీక్షించారు. ప్రతి విద్యార్థి నైపుణ్యాలను మెరుగుపరుచుకుని లక్ష్యాలు సాధించేందుకు కృషి చేయాలని సూచించారు.