వాలంటీర్లపై ఎమ్మెల్యే ఆగ్రహం

ముమ్మిడివరం: ముమ్మిడివరంలో గడపగడపకు మన ప్రభుత్వం కార్యక్రమానికి వాలంటీర్లు సకాలంలో హాజరుకాకపోవడంపై ఎమ్మెల్యే పొన్నాడ సతీష్‌కుమార్‌ ఆగ్రహం వ్యక్తం చేశారు. నగర పంచాయతీ రాయుడువారిపాలెం సచివాలయం పరిధిలోని 16 వార్డు బొక్కావారిపాలెం నుంచి గురువారం మధ్యాహ్నం గడప గడపకు మన ప్రభుత్వం కార్యక్రమం నిర్వహించేందుకు షెడ్యూలు ప్రకటించారు. ఎమ్మెల్యే సతీష్‌కుమార్‌ హాజరుకాగా.. సమయానికి వాలంటీర్లు, పలువురు సచివాలయ సిబ్బంది రాకపోవడంతో ఆయన అసహనం వ్యక్తం చేశారు. ప్రభుత్వం ప్రతిష్ఠాత్మకంగా నిర్వహిస్తున్న కార్యక్రమం విషయంలో అలసత్వం వహిస్తే కఠిన చర్యలు తీసుకుంటామని హెచ్చరించినట్లు తెలిసింది. కార్యక్రమాన్ని వాయిదా వేసి శుక్రవారం నిర్వహించాలని నిర్ణయించారు.