ఆక్వా రైతులకు ప్రభుత్వం షాక్‌

ఉమ్మడి జిల్లాలో 3,484 మందికి రాయితీ బంద్‌

అమలాపురం కలెక్టరేట్‌, న్యూస్‌టుడే: అసలే అంతంతమాత్రంగా ఉన్న ఆక్వా రంగంపై ప్రభుత్వ చర్యలు మూలిగే నక్కపై తాటికాయపడిన చందంగా ఉన్నాయి. విదేశీ ఎగుమతులు నిలిచి, మేత ధరలు పెరిగి నష్టాల్లో కొనసాగుతున్న ఆక్వా రైతులకు ప్రభుత్వం ఫిబ్రవరిలో షాకిచ్చింది. గత నెల వరకు నిర్వహించిన ఈ-ఫిష్‌ సర్వే ఆధారంగా ఉమ్మడి తూర్పుగోదావరి జిల్లావ్యాప్తంగా 3,484 మంది ఆక్వా రైతులకు ఫిబ్రవరి నెలకు సంబంధించి విద్యుత్తు రాయితీ ఎత్తివేశారు. దాంతో రైతులు లబోదిబోమంటున్నారు. ఉమ్మడి జిల్లావ్యాప్తంగా 7,404 ఆక్వా విద్యుత్తు సర్వీసులు ఉండగా, వారిలో 3,382 మంది రైతులకు రాయితీ వర్తింపజేశారు. 535 మందికి చెందిన వివరాలు మత్స్యశాఖ అధికారులు విద్యుత్తుశాఖ అధికారులకు ఇవ్వకపోవడంతో వారికి కూడా రాయితీని తాత్కాలికంగా నిలిపివేశారు. దీంతో పలువురు రైతులు ఆందోళనబాట పట్టేందుకు సిద్ధమవుతున్నట్లు సమాచారం. ఆక్వారంగాన్ని ప్రభుత్వపరంగా అన్నివిధాలా ప్రోత్సహిస్తామని చెబుతూనే వారు అందించే రాయితీలకు మాత్రం రోజుకో కొర్రీవేస్తూ తమను దగా చేస్తున్నారని పలువురు వాపోతున్నారు. ప్రభుత్వ విధానాలు ఇలాఉంటే ఆక్వాలో శాశ్వత సాగు విరామం చేపట్టాల్సిన పరిస్థితులు ఏర్పడతాయని రైతులు ఆందోళన వ్యక్తం చేస్తున్నారు.