ఇన్‌ఛార్జి ఏపీఎం అక్రమాలపై విచారణ

యానిమేటర్లను విచారిస్తున్న డీఆర్‌డీఏ పీడీ శివశంకరప్రసాద్‌

అయినవిల్లి, న్యూస్‌టుడే: మండలంలోని మహిళా సమాఖ్య ఇన్‌ఛార్జి ఏపీఎంగా పనిచేస్తున్న అయితాబత్తుల సురేంద్రబాబు మడుపల్లి, శానపల్లిలంక గ్రామాల్లో ఇద్దరు యానిమేటర్లు విధుల్లో లేకపోయినప్పటికీ రికార్డుల్లో పనిచేస్తున్నట్లు చూపించి వారివేతనం అక్రమంగా తీసుకుంటున్నారని, యానిమేటర్ల వద్ద నుంచి లోన్‌అప్రూవల్‌, అడిట్‌ అధికారులకు ఇవ్వాలని రూ.వెయ్యి నుంచి రూ.మూడువేల వరకు ఒక్కొక్కరి నుంచి డబ్బులు దండుకొని తమను వేధిస్తున్నట్లు తొత్తరమూడి గ్రామానికి చెందిన యానిమేటర్‌ బడుగు రమాదేవి గత సోమవారం స్పందన కార్యక్రమంలో కలెక్టర్‌కు లిఖితపూర్వకంగా ఫిర్యాదు చేశారు. ఈ ఘటనపై ఆయన విచారణకు ఆదేశించారు. శనివారం డీఆర్‌డీఏ పీడీ శివశంకరప్రసాద్‌ మండలంలోని యానిమేటర్లను కార్యాలయానికి పిలిపించి విచారణ చేపట్టారు. దీనిపై నివేదిక తయారుచేసి కలెక్టర్‌కు పంపుతానని ఈ సందర్భంగా ఆయన తెలిపారు.