సందేశమివ్వు..సందేహం తీరు!

న్యూస్‌టుడే, అంబాజీపేట

కొబ్బరిసాగులో ఆధునిక సాంకేతిక పద్ధతులను అవలంబించాల్సిన పరిస్థితులు ఏర్పడుతున్నాయని ఏపీ ఉద్యాన విశ్వవిద్యాలయం పరిధిలోని అంబాజీపేట ఉద్యాన పరిశోధన కేంద్రం అధిపతి డాక్టర్‌ బి.శ్రీనివాసులు పేర్కొన్నారు. కొబ్బరిపంటకు వ్యాపించే తెగుళ్లు, పురుగులు, కొబ్బరినూతన వంగడాలు, సాగుపద్ధతులు ఇలా పలు అంశాలపై ఆయన ‘న్యూస్‌టుడే’తో ముచ్చటించారు. కర్షకులు తమ సందేహాలను 73826 33653 ఈ నంబర్‌కు వాట్సాప్‌లో పంపితే సలహాలు, సూచనలు ఇవ్వనున్నట్లు ఆయన వెల్లడించారు.

* అంబాజీపేట ఉద్యాన పరిశోధన కేంద్రంలో అన్నదాతలకు అందిస్తున్న సేవలేవీ ?.
డాక్టర్‌ బి.శ్రీనివాసులు: రైతులు అడిగిన సందేహాలను నివృత్తి చేస్తున్నాం. కొబ్బరి, కొబ్బరితోటల్లో అంతరపంటల సాగు విధానాలపై జీవనియంత్రణ పద్ధతులు, నర్సరీ పెంపకం, కొబ్బరిలో సంకరీకరణపై రైతులకు అవగాహన కల్పిస్తున్నాం.వాట్సాప్‌ ద్వారా ప్రత్యేక సలహాలు, సూచనలు ఇస్తున్నాం.

* కొబ్బరిపంటను ఆశించి నష్టం చేకూర్చుతున్న తెల్లదోమ నివారణకు ఏం చర్యలు తీసుకున్నారు.?
కొబ్బరిలో తెల్లదోమ నివారణకు సమగ్ర కీటక యాజమాన్య పద్ధతులను అభివృద్ధి చేశాం. దీనిలో భాగంగా బదనికలను రైతులకు తక్కువ ధరకు అందజేస్తున్నాం. ఈ తెల్లదోమ నివారణకు జీవనియంత్రణ ద్వారా విస్తృతమైన పరిశోధనలు కూడా జరుపుతున్నాం.తెల్లదోమ నివారణకు ఉపయోగించే బదనికల అభివృధ్ధికి వివిధ సంస్థలకు ఎంవోయూ ద్వారా సాంకేతికతను పెంపొందిస్తున్నాం.

* కొబ్బరిసాగు విస్తీర్ణం పెంచేందుకు తీసుకుంటున్న చర్యలు.?
కొబ్బరిలో అయిదు రకాలతో పాటు నాలుగు హైబ్రీడు రకాలను విడుదల చేశాం. నాణ్యమైన కొబ్బరిమొక్కల తయారీ చేసి సరఫరా చేస్తున్నాం. కొబ్బరిసాగును ప్రోత్సహించేందుకు అవగాహన సదస్సులు, సమావేశాలు, సంకరీకరణపై శిక్షణలు నిర్వహిస్తున్నాం.

ఎస్సీ, ఎస్టీ ఉపప్రణాళికలో కొబ్బరిరైతులకు చేకూరుతున్న ప్రయోజనం.?
ఎస్సీ, ఎస్టీ ఉపప్రణాళికలో భాగంగా ఎంపిక చేసిన రైతులకు జీవశిలీంధ్రాలైన ట్త్రెకోడెర్మా, సూడోమోనాస్‌, బదనికలైన అపెర్టోక్రైసా ఆస్టర్‌ వంటివి రైతులకు అందజేస్తున్నాం. బ్యాటరీ పిచికారీ యంత్రాలను ఎస్సీ రైతులకు అందజేశాం.

* ఉచితంగా అందిస్తున్న సేవలు.?.
రైతుల క్షేత్రసందర్శన, శిక్షణ కార్యక్రమాలు, రైతులతో - ఉద్యాన శాస్త్రవేత్తముఖాముఖి, విలువ ఆధారిత ఉత్పత్తులపై అవగాహన, సంకరీకరణ, నర్సరీ యాజమాన్యంపై ప్రత్యేక కార్యక్రమాలు, పురుగులు, తెగుళ్లు అరికట్టే విధానాలపై అవగాహన కల్పిస్తున్నాం.

* తెగుళ్లు, పురుగుల నివారణకు వినియోగించే బదనికల సరఫరా ఏఏ జిల్లాలు, రాష్ట్రాలకు చేస్తున్నారు..?
కొబ్బరిపంటను ఆశించే పురుగులు, తెగుళ్ల నివారణకు ఉత్పత్తి చేస్తున్న అనేక జీవశిలీంధ్రాలు, బదనికలు అంతర పంటలపై కూడా ప్రభావం చూపుతున్నాయి.వీటిని ఏపీలోని అన్ని ప్రాంతాలతో పాటు ఒడిశా, తెలంగాణ, కర్ణాటక, తమిళనాడు రాష్ట్రాలకు అందజేస్తున్నాం.