తెలుగు వెలుగు ప్రపంచమంతా ప్రసరించాలి

యజ్ఞ పుస్తకాన్ని ఆవిష్కరిస్తున్న అతిథులు

నన్నయ విశ్వవిద్యాలయం(రాజానగరం): తెలుగు భాషకు ఎంతో ప్రాచీన చరిత్ర ఉందని, ఇటువంటి సదస్సుల ద్వారా తెలుగు వెలుగు ప్రపంచానికి ప్రసరింపజేసేలా మరింత కృషి చేయాలని ఆచార్య నాగార్జున విశ్వవిద్యాలయం రెక్టార్‌ ఆచార్య పి.వరప్రసాదమూర్తి అన్నారు. నన్నయలో నిర్వహించిన ప్రాచీన తెలుగు సాహిత్యం, చారిత్రక, సామాజిక, సాంస్కృతిక దృక్పథాలు అనే అంశంపై నిర్వహించిన మూడు రోజుల సదస్సు శనివారం ముగిసింది. ముఖ్యఅతిథిగా హాజరైన వరప్రసాదమూర్తి మాట్లాడుతూ భాషలోని వివిధ కోణాలను, సాహిత్య, చారిత్రక, సామాజిక నేపథ్యాలను వక్తలు, పరిశోధకులు వివరించారన్నారు. భవిష్యత్తులో ఇటువంటి సదస్సులు మరిన్ని జరగాలన్నారు. ఓఎస్డీ ఆచార్య ఎస్‌.టేకి మాట్లాడుతూ ఈ సదస్సులో చక్కని పరిశోధనా పత్రాలను సమర్పించిన పరిశోధకులు అభినందనీయులన్నారు. జాతీయ సదస్సు సంచాలకులు ఆచార్య మాడభూషి సంపత్‌ కుమార్‌, కన్వీనర్‌ డా.తరపట్ల సత్యనారాయణ మాట్లాడుతూ సదస్సులో 90 పరిశోధన పత్రాలను సమర్పించారన్నారు. అనంతరం కన్వీనర్‌ డా. తరపట్ల సత్యనారాయణ రచించిన యజ్ఞ వచన కవిత్వ కన్నడ అనువాద పుస్తకాన్ని అతిథులు ఆవిష్కరించారు. అనంతరం అతిథులను సన్మానించి ధ్రువపత్రాలు అందజేశారు. కార్యక్రమంలో డా.కేవీఎన్డీ వరప్రసాద్‌, డా.పీవీబీ సంజీవరావు, బి.వెంకటేశ్వరరావు, నూజిళ్ల శ్రీనివాసరావు, డా.ఎస్‌. సుధారాణి, డా.జె.మాధ్యాన తెలంగాణ, డా.నూనె అంకమరావు తదితరులు పాల్గొన్నారు.