నా ఇంటిని వదిలి వెళ్లండి: జవహర్‌

జవహర్‌కు నోటీసులు అందిస్తున్న పోలీసులు

కొవ్వూరు పట్టణం (చాగల్లు), న్యూస్‌టుడే: ‘నా ఇల్లు ఎటువంటి సంఘ వ్యతిరేక కార్యకలాపాలకు నిలయం కాదు.. నా ఇంటి ముందు మీరు ఉండటం నా ప్రాథమిక హక్కులకు భంగం కలిగే చర్య. వెంటనే వదిలి వెళ్లండి..’ అని మాజీ మంత్రి, తెదేపా నేత కె.ఎస్‌.జవహర్‌ పోలీసులను హెచ్చరించారు. సోమవారం తెల్లవారు జామున కొవ్వూరు పట్టణంలోని ఆయన ఇంటికి వెళ్లిన పోలీసులు నోటీసులు అందించారు. ఈ సందర్భంగా జవహర్‌ మాట్లాడుతూ రాష్ట్ర ప్రభుత్వం తీసుకొచ్చిన జీవో నం.1ను రద్దు చేయాలని కోరుతూ సోమవారం తలపెట్టిన ‘చలో అసెంబ్లీ’ కార్యక్రమాన్ని భగ్నం చేసేలా ముందస్తు గృహనిర్బంధాలకు పాల్పడటం సరికాదన్నారు. హక్కులకు భంగం కలిగించే ఇటువంటి చర్యలకు పాల్పడితే సంబంధిత అధికారులపై వ్యక్తిగతంగా అట్రాసిటీ కేసులు పెడతానన్నారు. ప్రతిపక్ష నాయకులపై నిర్బంధం పెట్టడం దారుణమన్నారు. పోలీసులు ఇచ్చిన నోటీసులను తిరస్కరిస్తున్నామన్నారు. దీంతో పోలీసు సిబ్బంది సాయంత్రం వరకు అక్కడే ఉండిపోయారు.