భార్య కాపురానికి రాలేదని ఆత్మహత్య

నాగేశ్వరరావు (పాత చిత్రం)

గోపాలపురం, న్యూస్‌టుడే: భార్య కాపురానికి రాకుండా విడిపోయి దూరంగా ఉంటుందని మనస్తాపంతో భర్త ఆత్మహత్య చేసుకున్న ఘటన గోపాలపురం మండలంలో చోటు చేసుకుంది. పోలీసులు తెలిపిన వివరాల ప్రకారం.. గోపాలపురం మండలం చిట్యాలకు చెందిన జుట్టా నాగేశ్వరరావు(33) ఇంటి నుంచి దుర్వాసన రావడంతో మంగళవారం రాత్రి స్థానికులు పోలీసులకు సమాచారం ఇచ్చారు. అక్కడకు వెళ్లి పరిశీలించగా నాగేశ్వరరావు ఇంట్లో ఇనుప రాడ్డుకు చున్నీతో ఉరేసుకున్నాడు. మృతుడికి బేబి అనే మహిళతో కొన్నేళ్ల కిందట వివాహమైంది. తొలుత ఇద్దరూ అన్యోన్యంగా ఉండేవారు. ఆ తర్వాత నాగేశ్వరరావు మద్యానికి బానిస అవ్వడంతో ఇద్దరి మధ్య గొడవలు ఏర్పడ్డాయి. కొన్నిరోజులుగా విడివిడిగా ఉంటున్నారు. ఈనెల 26న భార్యకు ఫోను చేసి ఇంటికి తిరిగొచ్చేయమని, లేదంటే చనిపోతానని హెచ్చరించాడు. గతంలోను ఇదే మాదిరిగా సైతం బెదిరించడంతో ఆమె పెద్దగా పట్టించుకోలేదు. దీంతో అదే రోజు ఉరేసుకుని ఉంటారని భావిస్తున్నారు. భార్య ఇచ్చిన ఫిర్యాదు మేరకు కేసు నమోదు చేసినట్లు ఎస్సై రామకృష్ణ తెలిపారు.