మహానాడు సభకు స్థల పరిశీలన

ఈనాడు - రాజమహేంద్రవరం: తెదేపా మహానాడు మే 27, 28న రాజమహేంద్రవరంలో నిర్వహించనున్నట్లు పార్టీ అధిష్ఠానం నిర్ణయించడంతో శ్రేణుల్లో ఉత్సాహం నెలకొంది. రాష్ట్రంలో నాలుగు ఎమ్మెల్సీ స్థానాలు గెలుపొందిన నేపథ్యంలో ఆ పార్టీ నేతల్లో ఈ నిర్ణయం మరింత జోరు పెంచింది. రాష్ట్రంలో ఏ పార్టీ అధికారంలోకి రావాలన్నా తూర్పు తీర్పే కీలకం కావడం.. ఇక్కడి ఓటర్లు ఏ పార్టీని ఆదరిస్తారో ఆ పార్టీ అధికారం చేపడుతుందనే సెంటిమెంట్‌ ఆది నుంచీ ఉంది. ఈ క్రమంలో చారిత్రక రాజధానిగా కీర్తి పొందిన రాజమహేంద్రవరంలో మహానాడు నిర్వహించనున్న నేపథ్యంలో.. ఆ పార్టీ ముఖ్యనేతలు స్థలాలను పరిశీలించే పనులు ప్రారంభించారు. పార్టీ పొలిట్‌బ్యూరో సభ్యుడు, రాజమహేంద్రవరం గ్రామీణ ఎమ్మెల్యే గోరంట్ల బుచ్చయ్యచౌదరి రాజమహేంద్రవరం సమీపంలోని జాతీయ రహదారి పక్కన, వేమగిరి సమీపంలో కొన్ని స్థలాలు చూసినట్లు తెలుస్తోంది. ఈ వివరాలను అధిష్ఠానం దృష్టికి తీసుకెళ్లి.. పార్టీ రాష్ట్ర అధ్యక్షుడు అచ్చెన్నాయుడు తదితరుల బృందం ఓ దఫా పరిశీలించాక తుది నిర్ణయం తీసుకునే వీలుంది. ప్రధానంగా భారీ సభాస్థలితోపాటు, సమీపంలోనే వాహనాలు నిలుపుదలకు వీలుగా ఉన్న ప్రాంతాలను ఎంపిక చేయాలని భావిస్తున్నారు. ఇప్పటికే స్థానిక హోటళ్లలో ఆ తేదీల్లో గదులు బుక్‌ చేసుకునేందుకు ఇతర ప్రాంతాల నాయకులు ఏర్పాట్లు చేస్తున్నట్లు తెలుస్తోంది. ఉత్తరాంధ్ర, రాయలసీమ ప్రాంతాల నుంచి లక్షలాదిగా పార్టీ శ్రేణులు వచ్చే వీలుందని భావిస్తున్నారు.