తమ్ముళ్లూ.. మీ సాహసం అభినందనీయం

ఆపద తప్పించిన యువకులకు చంద్రబాబు ప్రశంస

టి.నగర్‌ (రాజమహేంద్రవరం), న్యూస్‌టుడే: మహానాడు వేళ వేమగిరి వద్ద జరిగిన బహిరంగ సభలో ఊహించని ప్రమాదాన్ని ధైర్యంగా ఎదుర్కొన్న యువకులను చంద్రబాబు మంగళవారం ట్విటర్‌ ద్వారా ప్రశంసించారు. ఆ రోజు సభ వద్ద ఫ్లడ్‌ లైట్ల కోసం ఏర్పాటు చేసిన స్తంభం ఈదురుగాలులకు పడిపోయే పరిస్థితి ఏర్పడింది. అక్కడే ఉన్న పోలవరం మండలం కొత్త పట్టిసీమకు చెందిన బావమరుదులు విజయ్‌బాబు, రాజు ప్రాణాలకు తెగించి ఆ స్తంభాన్ని పట్టుకున్నారు. అక్కడ కూర్చొని ఉన్న సుమారు 300 మందిని దూరంగా వెళ్లిపోమని గట్టిగా అరిచారు. విద్యుత్తు తీగల రాపిడికి నిప్పు రవ్వలు ఎగసి పడడంతో ప్రమాదం జరుగుతుందని స్తంభాన్ని పక్కకు నెట్టారు. ఈ క్రమంలో వారు గాయపడ్డారు. ప్రస్తుతం వారిద్దరూ కోలుకుంటున్నారు. దీనిపై స్పందించిన చంద్రబాబు... ‘అక్కడ ఉన్న వారికి ఆపద రాకుండా ప్రాణాలకు తెగించి సాహసోపేతంగా వ్యవహరించినందుకు సెల్యూట్‌. ఈ ఘటనలో గాయపడిన మీరు త్వరగా కోలుకోవాలని దేవుడిని ప్రార్థిస్తున్నా...’ అంటూ ట్వీట్‌ చేశారు.