ఇదేం స్పందన..?

తమ దీనస్థితిని వివరిస్తున్న ఆర్టీసీ డ్రైవర్లు

కాకినాడ కలెక్టరేట్‌, న్యూస్‌టుడే: వివిధ కారణాలతో సస్పెన్షన్‌కు గురై కనిష్ఠంగా ఆరునెలలు, గరిష్ఠంగా రెండేళ్లు పూర్తయినా తిరిగి పోస్టింగ్‌లు ఇవ్వకపోవడంపై ఉమ్మడి జిల్లాలోని ఆర్టీసీ డ్రైవర్లు కొందరు గతనెల 22న కలెక్టరేట్‌ స్పందనలో వినతి పత్రం అందజేశారు. తొలగింపునకు, సస్పెన్షన్‌కు గురైనవారు ఇలా 60 మంది ఉన్నారన్నారు. ఉద్యోగాల్లో తీసుకుని తమ కుటుబాలను ఆదుకోవాలని వారంతా కలెక్టర్‌ కృతికాశుక్లాను వేడుకున్నారు. అనంతరం ఉద్యోగాలు ఇవ్వకపోగా, సమస్య పరిష్కరించినట్లు తమకు గతనెల 27న లేఖలు పంపించారని వారంతా ఆవేదన వ్యక్తం చేస్తున్నారు. దీంతో బాధిత డ్రైవర్లు గురువారం కలెక్టరేట్‌కు వెళ్లి ఈ విషయాన్ని అధికారుల దృష్టకి తీసుకెళ్లారు. న్యాయం చేయకపోగా, సమస్యను పరిష్కరించనట్లు లేఖలు పంపడం అన్యామని, తిరిగి ఫిర్యాదును తెరవాలని కోరారు. ఫిట్‌నెస్‌ లేదని కొంత మంది డ్రైవర్లను విధుల నుంచి తొలగించినా, వారికి అందాల్సిన రాయితీలు ఇవ్వడం లేదని, ప్రత్యామ్నాయ ఉపాధి చూపడం చూపలేదని ఆవేదన వ్యక్తం చేశారు.
కొసమెరుపు: సస్పెండైన, శాశ్వతంగా తొలగించబడిన ఆర్టీసీ డ్రైవర్లు గురువారం మళ్లీ కలెక్టరేట్‌కు వెళ్లి ఫిర్యాదు చేస్తున్నారని తెలుసుకున్న ఆ శాఖ అధికారులు వారిని వెనక్కి పిలిపించారు. న్యాయస్థానాలు ద్వారా తిరిగి పోస్టింగ్‌లకు ఉత్తర్వులు తెచ్చుకున్న వారిని విధుల్లో చేర్చుకోవడానికి అంగీకరించారు. కాకినాడ డిపోలో ఇద్దరు డ్రైవర్లకు పోస్టింగ్‌లు ఇచ్చారు. న్యాయ స్థానాలను ఆశ్రయించకుండా ఉద్యోగాల కోసం ఎదురుచూస్తున్న వారి గురించి ఉన్నతాధికారుల నుంచి మార్గదర్శకాలు రాగానే విధుల్లో తీసుకుంటామని చెప్పి పంపించడం కొసమెరుపు.