చంద్రబాబు ఆరోగ్య భద్రతపై అనుమానం

ఖైదీ మృతి నేపథ్యంలో పార్టీ శ్రేణుల ఆందోళన

టి.నగర్‌(రాజమహేంద్రవరం), న్యూస్‌టుడే: కేంద్ర కారాగారంలో ఉంటున్న ఖైదీ అనారోగ్యంతో మృతి చెందిన నేపథ్యంలో చంద్రబాబు ఆరోగ్యం విషయంలో పార్టీ శ్రేణులు ఆందోళన వ్యక్తం చేస్తున్నాయి. గురువారం రాజమహేంద్రవరంలో అర్బన్‌ తెలుగుదేశం పార్టీ ఆధ్వర్యంలో తలపెట్టిన రిలే నిరాహార దీక్షల్లో పార్టీ రాష్ట్ర కార్యనిర్వాహక కార్యదర్శి ఆదిరెడ్డి శ్రీనివాస్‌ మాట్లాడారు. చంద్రబాబు ఆరోగ్య భద్రతపై అనుమానాలున్నాయన్నారు. ‘‘జైలులో దోమలు కుడుతున్నాయని చంద్రబాబు చెబుతున్నారు.. అదే జైలులో వ్యక్తి డెంగీతో చనిపోయాడు.. మా నాయకుడికి అక్కడ రక్షణ ఏముంది..? జైలులో పరిస్థితిపై మాకు అనుమానాలు ఉండవా..? చంద్రబాబు కుటుంబ సభ్యులు చాలా ఆందోళనలో ఉన్నారు.. జడ్‌ ప్లస్‌ కేటగిరీలో ఉన్న నేతకు భద్రత, సౌకర్యాలు కల్పించాలి.. లోపాలు పునరావృతం కాకుండా జాగ్రత్తలు తీసుకుంటామని చెప్పలేని పరిస్థితిలో అధికారులు ఉన్నారు.. పెళ్లిరోజే కక్షతో జైలులో పెట్టినవారు చంద్రబాబు అరోగ్యంపై శ్రద్ధ తీసుకుంటారన్న నమ్మకం మాకు లేదు..’’ అంటూ ఆందోళన వ్యక్తం చేశారు. చంద్రబాబుకు ఏమైనా హాని తలపెట్టే ఉద్దేశం ఉందేమోననే ఆనుమానం వ్యక్తమవుతోందన్నారు. అధికారులు స్పందించి బాబు ఆరోగ్యంపట్ల తీసుకుంటున్న చర్యలను వెల్లడించాలన్నారు.