సీఎం దృష్టికి తీసుకువెళ్లి.. నా కుమారుడ్ని విడిపించండి

ఎమ్మెల్యే సతీష్‌కుమార్‌ ఎదుట కోడికత్తి శ్రీను తల్లి ఆవేదన

ముమ్మిడివరం, న్యూస్‌టుడే: కోడికత్తి కేసులో జైల్లో మగ్గుతున్న తన కుమారుడు శ్రీనివాసరావును విడుదల చేయించాలని కోరుతూ అతని తల్లి సావిత్రి ముమ్మిడివరం ఎమ్మెల్యే సతీష్‌కుమార్‌ను వేడుకున్నారు. ఆ వీడియో సామాజిక మాధ్యమాల్లో హల్‌చల్‌ చేస్తోంది. మండలంలోని ఠాణేలంకలో బుధవారం రహదారుల నిర్మాణానికి శంకుస్థాపన చేసేందుకు వచ్చిన ఎమ్మెల్యేను కలిసి సావిత్రి వేడుకున్నారు. ముఖ్యమంత్రి జగన్‌మోహన్‌రెడ్డిపై కోడికత్తి దాడి కేసులో నిందితుడు జనిపల్లి శ్రీనివాసరావు నాలుగేళ్లకుపైగా జైలులో ఉన్న విషయం తెలిసిందే. వృద్ధాప్యంలో ఉన్న తమకు అండగా ఉంటాడని, తమ కుమారుడి విడుదలకు ముఖ్యమంత్రి జగన్‌మోహన్‌రెడ్డి దృష్టికి తీసుకెళ్లాలని సావిత్రి కోరారు. ఎమ్మెల్యే స్పందిస్తూ విషయాన్ని ముఖ్యమంత్రి దృష్టికి తీసుకెళ్తానని హామీ ఇచ్చారు.