దారి దోపిడీ ఘటనలో ముగ్గురు హిజ్రాల అరెస్టు

అమలాపురం పట్టణం: అమలాపురం పట్టణ శివారు సావరం బైపాస్‌ రోడ్డులో అంబాజీపేట మండలానికి చెందిన యువకుడిని దారి దోపిడీ చేసిన ముగ్గురు హిజ్రాలను అరెస్టు చేసినట్లు డీఎస్పీ అంబికాప్రసాద్‌ శనివారం రాత్రి తెలిపారు. ఆయన వివరాల ప్రకారం.. గురువారం రాత్రి అటుగా వెళ్తున్న యువకుడిని ఆపి హిజ్రాలు కాసేపు కాలక్షేపం చేసి రూ.500 ఫోన్‌ పే చేయించుకున్నారు. ఆ తరువాత అతని మెడలోని బంగారు గొలుసు లాక్కుని పోతుండగా యువకుడు లాగేయడంతో కొంతముక్క తెగిపోయింది. మిగిలిన గొలుసుతో ఆ ముగ్గురూ ద్విచక్ర వాహనంపై పరారయ్యారు. దీనిపై అమలాపురం పట్టణ పోలీస్‌స్టేషన్‌లో ఫిర్యాదు అందుకున్న సీఐ వీరబాబు ఆధ్వర్యంలో ఎస్‌ఐ జోషి కేసు నమోదుచేసి దర్యాప్తు చేశారు. కాకినాడ వలసపాకలకు చెందిన రెల్లి రవి అలియాస్‌ స్వీటీ (20), రేచర్లపేటవాసులు ఏడిద రమేష్‌ అలియాస్‌ కీర్తి (21), గుల్లపల్లి రాజు అలియాస్‌ అమూల్య (23)లను అదుపులోకి తీసుకున్నామన్నారు. వారి నుంచి ద్విచక్ర వాహనాన్ని, 4.7 గ్రాముల బంగారం చైన్‌ స్వాధీనం చేసుకున్నామన్నారు. వారిని అమలాపురం కోర్టులో శనివారం హాజరుపరిచి రాజమహేంద్రవరం సెంట్రల్‌జైలుకు తరలించినట్లు తెలిపారు.