ఓటీఎస్‌ సద్వినియోగం చేసుకోండి

ప్రసంగిస్తున్న కలెక్టర్‌ వివేక్‌ యాదవ్‌

చిలకలూరిపేట పట్టణం, న్యూస్‌టుడే: ఓటీఎస్‌ను లబ్ధిదారులు సద్వినియోగం చేసుకోవాలని కలెక్టర్‌ వివేక్‌ యాదవ్‌ చెప్పారు. చిలకలూరిపేట ఎంపీడీవో కార్యాలయంలో శనివారం జరిగిన సమావేశంలో ఆయన మాట్లాడారు. ఓటీఎస్‌ లబ్ధిదారులకు రుణంతో పాటు వడ్డీ కూడా మాఫీ అవుతుందన్నారు. గ్రామీణ ప్రాంతంలో రూ.10వేలు, పురపాలక సంఘంలో రూ.20వేలు, నగరపాలక సంస్థలో లబ్ధిదారులు రూ.20వేలు చెల్లించాల్సి ఉంటుందన్నారు. నగదు చెల్లించిన వారికి శాశ్వత గృహ హక్కు పథకం అందజేస్తారని చెప్పారు. జిల్లాలో 13వేల మంది ఈ పథకాన్ని ఉపయోగించుకున్నారని చెప్పారు. పేట పురపాలక సంఘ పరిధిలో 370 ఓటీఎస్‌కు నగదు చెల్లించారన్నారు. పురపాలక సంఘ ఛైర్మన్‌ ఎస్‌కే రఫాని, కమిషనర్‌ డి.రవీంద్ర, తహశీల్దార్‌ సుజాత, కౌన్సిలర్లు పాల్గొన్నారు.