ఇక అమ్మకుఆధారం ఏదీ?

రామారావు (పాతచిత్రం)

వినుకొండ, న్యూస్‌టుడే : ఒక్కగానొక్క కుమారుడు.. తండ్రి లేని లోటు లేకుండా పెంచిన తల్లి.. నేడో రేపో పెళ్లి చేసి ఒక ఇంటివాన్ని చేద్దామనుకున్న ఆమె కల నెరవేరకుండానే అతను నీటిపాలయ్యాడు. తమిళనాడులోని భవాని వద్ద కాల్వ నీటిలో శుక్రవారం గల్లంతైన పొట్టి రామారావు (25) మృతితో కన్నతల్లి కన్నీటి పర్యంతమైంది. మృతుని అంత్యక్రియలు వినుకొండలో అదివారం నిర్వహించారు. పట్టణంలోని బోసుబొమ్మ సెంటర్‌కు చెందిన ఫార్మసీ వ్యాపారం చేస్తున్న రామారావు మరికొంతమంది మిత్రులతో కలిసి శబరిమలై ఈనెల 13న కారులో బయలుదేరి మరుసటి రోజు మార్గమధ్యలో స్నానం కోసం కాల్వలో దిగగా కాలు జారి రామారావు నీళ్లలో కొట్టుకు పోయాడు. సుమారు 7 కి.మీ. దూరంలో అతని మృతదేహం శనివారం బయటపడింది. తండ్రి శంకర్రావు చిన్నప్పుడే చనిపోవడంతో అమ్మ, కుమారుడు ఇద్దరే ఉండేవారు. ఫార్మసీ దుకాణంలో గుమస్తాగా ఉంటూ రామారావు రెండేళ్ల నుంచి స్నేహితుల సహకారంతో సొంతంగా వ్యాపారం చేస్తూ తన కాళ్లమీద తాను నిలబడ్డాడు. ఈలోపే మృత్యువు కబళించింది. మంచి మిత్రుడ్ని కోల్పోయామని స్నేహితులు ఆవేదన చెందారు.