కొంగ నల్లన.. మెడ తెల్లన..

సూర్యలంక తీరానికి అరుదైన కొంగలు వలసొచ్చాయి. నల్లని రెక్కలతో కనిపించే ఈ కొంగల మెడ మాత్రం తెల్లగా కనిపిస్తుంది. ఇండో- చైనా సరిహద్దు, ఉత్తర సుమత్రా దీవులు, ఫిలిప్పైన్స్‌, మలయా ద్వీపకల్పం, ఆఫ్రికాలోని సహారా దక్షిణ భాగంలో ఇవి ఎక్కువగా సంచరిస్తుంటాయి. వీటిని అంతరించిపోతున్న పక్షి జాతిగా పర్యావరణ వేత్తలు పేర్కొంటున్నారు. సూర్యలంక వాయుసేన కేంద్రం సమీపంలో చప్టా వద్ద పర భూముల్లో ఐదు తెల్ల మెడకొంగలు ఆహారం కోసం చేపల వేట సాగిస్తూ ఉండగా బాపట్లకు చెందిన పక్షి ప్రేమికుడు, పర్యావరణవేత్త రమణ తన కెమెరాలో బంధించారు. ఈ ప్రాంతంలో తొలిసారిగా తెల్ల మెడ కొంగలు కనిపించాయని ఆయన తెలిపారు. మన దేశానికి వలసొచ్చే ఈ కొంగలు శీతకాలంలో ఉత్తర భారతం నుంచి దక్షిణానికి వస్తాయని వెల్లడించారు. - బాపట్ల, న్యూస్‌టుడే