గణతంత్ర వేడుకలకు ఏర్పాట్లు పూర్తి

కలెక్టరేట్‌(గుంటూరు), న్యూస్‌టుడే: గణతంత్ర వేడుకలు బుధవారం ఉదయం పోలీసు కవాతు మైదానంలో జరగనున్నాయి. అధికార యంత్రాంగం రెండు రోజులుగా చేస్తున్న గణతంత్ర దినోత్సవానికి సంబంధించిన ఏర్పాట్ల పనులు మంగళవారం సాయంత్రానికి పూర్తయ్యాయి. వీటిని గుంటూరు తూర్పు తహసీల్దార్‌ శ్రీకాంత్‌ పర్యవేక్షించారు. బుధవారం ఉదయం 9 గంటలకు జిల్లా కలెక్టర్‌ వివేక్‌యాదవ్‌ జాతీయ పతాకావిష్కరణ చేయనున్నారు. అనంతరం జిల్లాలో అభివృద్ధి కార్యక్రమాలకు సంబందించిన నివేదికను వివరిస్తారు. ఈ సందర్భంగానే ప్రభుత్వ శాఖల వారీగా శకటాల ప్రదర్శన, విద్యార్థుల సాంస్కృతిక పోటీలు నిర్వహణకు కూడా ఏర్పాట్లు చేశారు. చివరిగా విధి నిర్వహణలో ఉత్తమంగా సేవలందించిన పలువురు ఉద్యోగులకు అవార్డులను జిల్లా కలెక్టర్‌ చేతుల మీదుగా అందించనున్నారు.