23న అంబేడ్కర్‌ గుడి ప్రారంభం

గుంటూరు(అరండల్‌పేట), న్యూస్‌టుడే: పల్నాడుజిల్లా సత్తెనపల్లి మండలం పెదమక్కెనలో ఈనెల 23న అంబేడ్కర్‌ గుడిని ప్రారంభించనున్నామని ఏపీ అంబేడ్కర్‌ యూత్‌ అసోసియేషన్‌ వ్యవస్థాపక అధ్యక్షుడు డాక్టర్‌ గోళ్లమూడి రాజసుందరబాబు తెలిపారు. శనివారం గుంటూరులోని రాష్ట్ర నీటిపారుదల శాఖ మంత్రి అంబటి రాంబాబు క్యాంపు కార్యాలయంలో అంబేడ్కర్‌ గుడి ప్రారంభోత్సవ గోడప్రతులను మంత్రి రాంబాబు, నరసరావుపేట ఎంపీ లావు శ్రీకృష్ణదేవరాయలు ఆవిష్కరించారు. ఈ సందర్భంగా రాజసుందరబాబు మాట్లాడుతూ రాజ్యాంగం ద్వారా కలిగిన ప్రయోజనాలు, సామాజిక న్యాయం దృష్టిలో ఉంచుకొని రాజ్యాంగ నిర్మాత డాక్టర్‌ బీఆర్‌ అంబేడ్కర్‌కు పెదమక్కెన గ్రామ దళితులు 27 అడుగుల గుడిని కట్టించారని తెలిపారు. గుడి ప్రారంభోత్సవం సందర్భంగా కులాంతర, మతాంతర వివాహాలు జరపనున్నట్లు తెలిపారు. కార్యక్రమంలో వివిధ సంఘాల నాయకులు మద్దు ప్రేమజ్యోతిబాబు, గాలి రాము, దుగ్గెంపూడి శ్రీనివాసరెడ్డి, మార్కు, ఓబయ్య, తదితరులు పాల్గొన్నారు.