అసైన్డు భూముల్లో మళ్లీ తవ్వకాలు

న్యూస్‌టుడే- చేబ్రోలు: అక్రమార్కులు మళ్లీ అసైన్డు భూముల్లో తవ్వకాలు ప్రారంభించారు. ఈ విషయంపై ఇటీవల ‘ఈనాడు’లో వచ్చిన వరుస కథనాల నేపధ్యంలో గత నెల 16 నుంచి 30 వరకు నలుగురు అధికారులను వీఎన్‌ పాలెంలోని క్వారీల వద్ద కాపలాగా ఉంచారు. గత రాత్రి నుంచి మళ్లీ అసైన్డు భూముల్లోని మట్టిని తవ్వి తరలిస్తున్నారు. శనివారం అక్కడ నిఘా విధులు నిర్వహిస్తున్న మైనింగ్‌ ఆర్‌ఐ శివపార్వతి అక్కడికి చేరుకుని మట్టి అక్రమ తవ్వకాలను అడ్డుకున్నారు.

అధికారులపై ఆగ్రహం.. వీఎన్‌ పాలెంలో సర్వే నంబరు ‘502-ఎ’లో 0.46 ఎకరాల్లో 15 రోజుల పాటు మట్టిని తవ్వుకునేందుకు మైనింగ్‌ శాఖ నుంచి అనుమతులు తీసుకున్నారు. ఇదే అదనుగా భావించి పక్కనే ఉన్న అసైన్డు భూముల్లో మట్టిని తరలిస్తుండగా ఆర్‌ఐ శివపార్వతి, విజిలెన్స్‌ ఐజి కొండారెడ్డి అక్కడికి చేరుకుని మట్టి తవ్వకాలను నిలిపి వేశారు. దీంతో మట్టిని తవ్వుకునేందుకు అనుమతి తీసుకున్న ఓ ప్రజాప్రతినిధి బంధువు అక్కడికి చేరుకుని అధికారులపై ఆగ్రహం వ్యక్తం చేశారు. అనుమతి తీసుకున్న పొలం నుంచి మట్టిని తరలించేందుకు అసైన్డు భూముల్లో నుంచి దారి ఏర్పాటుచేసుకొంటున్నామనీ, మట్టిని తరలించడంలేదని పేర్కొంటూ అధికారులపై మండిపడ్డారు.