వైకాపా ర్యాలీతో రాకపోకలకు అంతరాయం

న్యూస్‌టుడే, ఫిరంగిపురం గ్రామీణం: వైకాపా ఫ్లీనరీ కోసం ఫిరంగిపురం వచ్చిన ఎమ్మెల్యేలు సుచరిత, శ్రీదేవి ముందుగా రాజశేఖర్‌రెడ్డి విగ్రహానికి పూలమాల వేసి సొలస బస్టాండ్‌ సెంటర్‌ నుంచి ర్యాలీగా బయలుదేరి సభా వేదిక వద్దకు వెళ్లారు. ఆ సమయంలో రోడ్డు కిక్కిరిసింది. సుమారు అరగంట సేపు రాకపోకలకు అంతరాయం కలిగింది. వాహనాలు భారీగా నిలిచిపోయాయి. దీంతో ప్రయాణికులు ఇబ్బంది పడ్డారు. ఫ్లీనరీలో పాల్గొనేందుకు ఫిరంగిపురం, మేడికొండూరు మండలాల్లోని డ్వాక్రా మహిళలు భారీగా అక్కడకు చేరుకున్నారు. ర్యాలీలో తిరుగుతూ పార్టీ జెండాలు పట్టుకుని కనిపించారు.