logo
Published : 30 Jun 2022 05:17 IST

ఆటో ఎక్కి మృత్యుఒడికి చేరి

కారు ఢీకొట్టడంతో ఇద్దరి దుర్మరణం
ఆరుగురికి తీవ్ర గాయాలు

రోడ్డు పక్కన బోల్తా పడిన ఆటో

చిలకలూరిపేట గ్రామీణ, న్యూస్‌టుడే: చిలకలూరిపేట మండలం రామచంద్రాపురం అడ్డరోడ్డు బైపాస్‌ రహదారి మలుపు ప్రాంతంలో బుధవారం చోటుచేసుకున్న ప్రమాదంలో ఇద్దరు మృతి చెందగా ఆరుగురికి తీవ్ర గాయాలయ్యాయి. పోలీసులు తెలిపిన వివరాల మేరకు బాపట్ల జిల్లా మార్టూరు నుంచి ప్రయాణికులతో చిలకలూరిపేట బయలుదేరిన ఆటో రామచంద్రాపురం సర్వీస్‌ రోడ్డు నుంచి జాతీయ రహదారికి ఎక్కే క్రమంలో నెల్లూరు నుంచి విజయవాడ వెళ్తున్న కారు వెనుక నుంచి ఢీకొట్టింది. ఆటో రోడ్డు పక్కన బోల్తా పడగా, కారు పక్కకు దూసుకెళ్లి జాతీయ రహదారిపై అడ్డంగా పడిపోయింది. ఆటోలో ప్రయాణిస్తున్న బొప్పూడి గ్రామానికి చెందిన షేక్‌ ఖాశింపీరా (60), మార్టూరుకు చెందిన ఆటో డ్రైవర్‌ కరీమ్‌బాషా, అదే మండలం నాగరాజుపల్లి గ్రామానికి చెందిన అత్తా కోడళ్లు గల్లా పేరమ్మ (60), శౌరమ్మ తీవ్రంగా గాయపడ్డారు. వారిని చిలకలూరిపేట ప్రభుత్వ ఆసుపత్రికి తరలించారు. అక్కడ చికిత్స పొందుతూ షేక్‌ ఖాశింపీరా, గల్లా పేరమ్మ(60) మృతి చెందారు. కారులో ప్రయాణిస్తూ ప్రమాదంలో గాయపడిన నలుగురు గుంటూరులోని ప్రైవేటు ఆసుపత్రిలో చికిత్స పొందుతున్నారు. చిలకలూరిపేట గ్రామీణ ఎస్సై రాజేష్‌ ఘటనా స్థలాన్ని పరిశీలించి కేసు నమోదు చేసి దర్యాప్తు చేస్తున్నారు.

మిన్నంటిన రోదనలు.. ప్రమాదంలో తీవ్రంగా గాయపడి మృతి చెందిన ఇద్దరూ పేద కుటుంబానికి చెందిన వారే. చిలకలూరిపేట మండలం బొప్పూడి గ్రామానికి చెందిన ఖాశింపీరా మార్టూరు సమీపంలోని ఒక గ్రానైట్‌ ఫ్యాక్టరీలో కూలి పనులు చేసేవాడు. మంగళవారం రాత్రి విధులకు హాజరైన అతను బుధవారం ఉదయం ఆటో ఎక్కి బొప్పూడికి వస్తున్నాడు. ఒకటిన్నర కిలోమీటరు దూరం వస్తే అతను దిగవలసిన స్టేజీ వస్తుంది. ప్రమాదంలో తీవ్రంగా గాయపడి తుదిశ్వాస విడిచాడు. విషయం తెలుసుకున్న కుటుంబ సభ్యులు చిలకలూరిపేట ప్రభుత్వ ఆసుపత్రి వద్దకు చేరుకున్నారు. కొద్దిసేపటికే కన్నుమూయడంతో వారు కన్నీరుమున్నీరయ్యారు. మార్టూరు మండలం నాగరాజుపల్లికి చెందిన గల్లా పేరమ్మ, శౌరమ్మ అత్తా కోడళ్లు. చిలకలూరిపేట మండలంలోని కావూరు గ్రామంలో బంధువుల ఇంట్లో వివాహానికి హాజరయ్యేందుకు మార్టూరులో ఆటో ఎక్కారు. పేరమ్మ చిలకలూరిపేట ప్రభుత్వ ఆసుపత్రిలో చికిత్స పొందుతూ మృతి చెందారు. గ్రామంలో ఆమె నివాస ప్రాంతం, కావూరులో పెళ్లి ఇంట విషాదం అలముకుంది. చిలకలూరిపేట ప్రభుత్వ ఆసుపత్రి వద్ద బంధువుల రోదనలు మిన్నంటాయి.

Read latest Guntur News and Telugu News

Follow us on Facebook, Twitter, Instagram, Koo, ShareChat, and Google News.

Tags :

గమనిక: ఈనాడు.నెట్‌లో కనిపించే వ్యాపార ప్రకటనలు వివిధ దేశాల్లోని వ్యాపారస్తులు, సంస్థల నుంచి వస్తాయి. కొన్ని ప్రకటనలు పాఠకుల అభిరుచిననుసరించి కృత్రిమ మేధస్సు సాంకేతికతతో పంపబడతాయి. ఏ ప్రకటనని అయినా పాఠకులు తగినంత జాగ్రత్త వహించి, ఉత్పత్తులు లేదా సేవల గురించి సముచిత విచారణ చేసి కొనుగోలు చేయాలి. ఆయా ఉత్పత్తులు / సేవల నాణ్యత లేదా లోపాలకు ఈనాడు యాజమాన్యం బాధ్యత వహించదు. ఈ విషయంలో ఉత్తర ప్రత్యుత్తరాలకి తావు లేదు.


మరిన్ని

ap-districts
ts-districts

ఎక్కువ మంది చదివినవి (Most Read)

మరిన్ని