ఎవరెవరి ఖాతాల్లో ఎంత జమచేశారు?

కారంచేడులో పంచాయతీ నిధుల దుర్వినియోగం ఆరోపణలపై విచారణ చేస్తున్న డీపీవో రమేష్‌

కారంచేడు, న్యూస్‌టుడే: పంచాయతీ నిధుల వినియోగంలో నిబంధనలు అతిక్రమించిన వారిపై చర్యలు తప్పవని జిల్లా పంచాయతీ అధికారి రమేష్‌ స్పష్టం చేశారు. కలెక్టర్‌ ఆదేశాల మేరకు బుధవారం కారంచేడు పంచాయతీ నిధులు రూ.75.89 లక్షలు దుర్వినియోగం ఆరోపణలపై స్థానిక పంచాయతీ కార్యాలయంలో విచారణ జరిపారు. నిధులను ఎవరెవరి ఖాతాల్లో ఎంత జమచేశారనే దానిపై వివరాలు తీసుకున్నారు. ఆరోపణలు ఎదుర్కొంటున్న గతంలో పనిచేసిన కార్యదర్శి బ్రహ్మయ్య, ప్రత్యేకాధికారి శివనాగప్రసాద్‌, మండల పరిషత్‌ కార్యాలయ సహాయకురాలు విమల, బిల్‌ కలెక్టర్‌ గోపిరాజు, చెరువు కాపలాదారు కరీముల్లా, స్వీపర్‌ ఎం.శ్రీనివాసరావు నుంచి లిఖిత పూర్వక వివరణలు తీసుకున్నారు. శానిటరీ మేస్త్రి విచారణకు హాజరు కాలేదు. సమగ్ర నివేదికను కలెక్టర్‌కు అందజేస్తానని డీపీవో రమేష్‌ తెలిపారు. అదేవిధంగా పంచాయతీకి చెందిన చెరువు కౌలు ఆదాయం రూ.3 లక్షలు ఎందుకు జమచేయలేదని గతంలో పనిచేసిన కార్యదర్శి బ్రహ్మయ్యను డీపీవో ప్రశ్నించారు. గుమస్తా వసూలు చేశారని, తనకు అప్పగించలేదని చెప్పినట్లు తెలిసింది. నిధులను ఇష్టం వచ్చినట్లు ఎలా వినియోగిస్తారని ప్రశ్నించినట్లు సమాచారు. విచారణలో డీఎల్పీవో వెంకట్రావు, సర్పంచి బాలిగ శివపార్వతి తదితరులు పాల్గొన్నారు.