రాక్షస పాలన అంతానికి మినీ మహానాడు నాంది: తెదేపా

నరసరావుపేట అర్బన్‌, న్యూస్‌టుడే : రాష్ట్రంలో రాక్షసపాలన అంతానికి 12న నరసరావుపేటలో నిర్వహించే మినీ మహానాడు నాంది కావాలని గురజాల మాజీ ఎమ్మెల్యే, తెదేపా నేత యరపతినేని శ్రీనివాసరావు పేర్కొన్నారు. మినీ మహానాడు సభావేదిక ప్రాంగణాన్ని మంగళవారం ఆయన పార్టీ నియోజకవర్గ ఇన్‌ఛార్జి డాక్టర్‌ చదలవాడ అరవిందబాబు, నేతలతో కలిసి పరిశీలించారు. సభావేదిక నిర్మాణం, పార్కింగ్‌, ప్రజలు కూర్చునేందుకు ఏర్పాట్లు తదితర అంశాలపై చర్చించారు. నరసరావుపేట పార్లమెంట్‌ పరిధిలోని అన్ని నియోజకవర్గాల నుంచి ప్రజలు పెద్దఎత్తున వచ్చే అవకాశం ఉందని చెప్పారు. మండలాల వారీగా సమావేశాలు ఏర్పాటు చేసుకుని విజయవంతానికి కృషి చేయాలని పార్టీ నేతలకు ఆయన సూచించారు. అనంతరం విలేకర్లతో మాట్లాడుతూ రాష్ట్రంలో ఎన్నికలు ఎప్పుడు ఎన్నికలు జరిగినా కార్యకర్తలు సిద్ధంగా ఉండాలని చెప్పారు.