గడువు తీరిన చిరుతిండి విక్రయాలు

అస్వస్థతకు గురైన నలుగురు చిన్నారులు

కిరాణ దుకాణం వద్ద తల్లిదండ్రుల ఆందోళన

సత్తెనపల్లి, న్యూస్‌టుడే : కాలం చెల్లిన చిరుతిండి ప్యాకెట్లు తిన్న నలుగురు చిన్నారులు అస్వస్థతకు గురయ్యారు. పోలీసులు, బాధితులు తెలిపిన వివరాల మేరకు.. స్థానిక కాకతీయ కల్యాణ మండపం సమీపంలోని ఓ కిరాణా దుకాణంలో నలుగురు చిన్నారులు కుర్‌కురే ప్యాకెట్లు కొనుగోలు చేసి తిన్నారు. కాసేపటికి వారు కడుపు నొప్పితో విలవిల్లాడుతూ వాంతులు చేసుకున్నారు. వేర్వేరుగా తల్లిదండ్రులు ఆర్‌ఎంపీ వద్దకు తీసుకెళ్లగా కుర్‌కురేలు తిని వాంతులు చేసుకున్నట్లు పిల్లలు ఆయనకు చెప్పారు. 11 ఏళ్ల వైభవ్‌ అనే చిన్నారిని ప్రైవేట్‌ ఆసుపత్రిలో చేర్పించారు. వైభవ్‌తోపాటు ఆ ప్యాకెట్లు తిన్న చిన్నారుల తల్లిదండ్రులు దుకాణం వద్ద శనివారం రాత్రి ఆందోళన చేశారు. పిల్లలు తిన్న ప్యాకెట్లు పరిశీలించగా వాటి కాలపరిమితి ఈ ఏడాది జనవరితోనే ముగిసినట్లు ఉంది. కాలం చెల్లిన ప్యాకెట్లు ఎలా అమ్ముతున్నారంటూ వ్యాపారిని ప్రశ్నించారు. ఈ రోజు మధ్యాహ్నమే పట్టణంలోని కూరగాయల మార్కెట్‌ సమీపంలోని హోల్‌సేల్‌ వర్తకుడు వాటిని ఇచ్చారని, తాను చూసుకోలేదని వ్యాపారి చెప్పారు. పిల్లల తల్లిదండ్రుల ఆందోళన విషయం తెలుసుకున్న ఎస్సై కిషోర్‌ సిబ్బందితో అక్కడికి చేరుకుని విచారించారు. దుకాణాన్ని మూసేయించి వ్యాపారిని స్టేషన్‌కు తరలించారు. ఆహార కలుషితంపై విచారణ చేస్తున్నట్లు ఎస్సై తెలిపారు.

2022 జనవరితో కాల పరిమితి ముగిసినట్లు ఉన్న వివరాలు