సంప్రదాయబద్ధంగా కోడిపోరు

కారంపూడి, న్యూస్‌టుడే: పల్నాటి వీరుల ఆరాధనోత్సవాల్లో నాలుగో రోజు శనివారం కోడిపోరు నిర్వహించారు. పల్నాటి యుద్ధానికి బీజం వేసిన కోడిపోరును నాటకీయ పరిణామాలతో వీర్లదేవాలయం ముందు బ్రహ్మన్నగా పీఠాధిపతి తరుణ్‌ చెన్నకేశవ చిట్టిమల్లు కోడితో, నాగమ్మ వేషంలో ఆచారవంతుడు సివంగిడేగ కోడితో పోరుకు సిద్ధమవగా ప్రభుత్వ విప్‌ ఎమ్మెల్యే పిన్నెల్లి రామకృష్ణారెడ్డి పీఠాధిపతిని అనుసరించారు. ఈక్రమంలో బరిలో మూడు పర్యాయాలు కోడి పోరు సలిపి బ్రహ్మన్న కోడి ఓడినట్లుగా రాజ్యం వీడి అరణ్యవాసం చేయాలంటూ మలిదేవుల పరివారానికి సూచించినట్లు చూపారు. కోడిపోరు ఘట్టాన్ని చూసేందుకు పెద్దఎత్తున ప్రజలు తరలి వచ్చారు. వీరవిద్యావంతుల గానాలాపన మధ్య క్రతువు ముగించారు. ఉదయం నాగులేరు గంగదారి మడుగులో కొణతాలకు పవిత్రస్నానాలు చేయించి వీరగంధం పూసి ప్రత్యేకంగా అలంకరించారు. వీర్లదేవాలయ ప్రాంగణంలో ఆచారవంతులు కత్తిసేవ చేశారు. గ్రామోత్సవంగా చెన్నకేశవస్వామి దేవాలయంలో పూజలు చేసి శంకుతీర్థం తీసుకొని బ్రహ్మన్న విగ్రహం వద్ద సేవ చేశారు. అనంతరం అంకాళమ్మ గుడికి చేరి ఆచారవంతులు కత్తులు శరీరాలపై మోదుకుంటూ ఆచారం నిర్వహించారు. పీఠాధిపతి ఇల్లు చేరి ఆయన సమక్షంలో సేవ చేశారు. భక్తులు పెద్ద ఎత్తున వీర్లదేవాలయం, చెన్నకేశవస్వామి, అంకాళమ్మ దేవాలయాల్లో పూజలు చేసి మొక్కులు చెల్లించుకున్నారు. మహిళలు అమ్మవారికి బోనాలు సమర్పించారు.