భారీ వాహనాల రాకపోకలతో ప్రమాదాలు

టిప్పర్లను అడ్డుకుని నిరసన తెలుపుతున్న స్థానికులు

యద్దనపూడి, న్యూస్‌టుడే: సామర్థ్యానికి మించి లోడుతో ప్రమాదకరంగా ప్రయాణిస్తున్న భారీ వాహనాలను మహిళలు, స్థానికులు అడ్డుకున్న ఘటన యద్దనపూడిలో సోమవారం చోటుచేసుకుంది. భారీ లోడుతో కొండరాళ్లను తీసుకెళ్తున్న ఐదు టిప్పర్లు నిలిపివేశారు. అనుమతి మేరకు గ్రామీణ రహదారులపై రవాణా సాగించాలని నిరసన తెలిపారు. బల్లికురవ మండలంలోని క్వారీ నుంచి రాళ్లను సూరవరపుపల్లె, అనంతవరం, యనమదల, యద్దనపూడి, జాగర్లమూడి గ్రామాల మీదుగా పర్చూరు, చీరాలకు ప్రమాదకరంగా తరలిస్తున్నారని ఆక్షేపించారు. సుమారు 40 టన్నుల పైగా రాళ్లతో వాహనాలు వేగంగా ప్రయాణిస్తుండటంతో తరచూ ప్రమాదాలు చోటుచేసుకుంటున్నాయని ఆవేదన వ్యక్తం చేశారు. విషయం తెలుసుకున్న పోలీసులు ఘటనా స్థలిని పరిశీలించారు. సమస్యను ఉన్నతాధికారుల దృష్టికి తీసుకెళ్తామని తెలిపారు.