మోగనున్న పెళ్లి బాజా

మూడు నెలల తరువాత సందడి
న్యూస్‌టుడే-గుంటూరు

ఉమ్మడి జిల్లాకు పెళ్లి కళ వచ్చేసింది. మూడు నెలల తరువాత సందడి నెలకొంది. వేసవి తరువాత పెళ్లిళ్లకు అనుకూలమైన వాతావరణం డిసెంబరులో ఉండటంతో ఈ మాసంలో అధిక సంఖ్యలో వివాహాలు జరగనున్నాయి.గుంటూరు,  తెనాలి, నరసరావుపేట, చిలకలూరిపేట,  బాపట్ల పట్టణాల్లో కల్యాణ మండపాలు పెళ్లిళ్లకు రిజర్వ్‌ అయ్యాయి.  

గత ఆగస్టు నెలాఖరు నుంచి నవంబరు వరకు పెళ్లి ముహూర్తాలు లేవు. ఈ నెలలో రెండు నుంచి 21వ తేదీ వరకు లగ్నాలు ఉన్నాయి. 3, 4, 7, 8, 16, 17, 18 తేదీల్లో మంచి ముహూర్తాలు ఉండటంతో వేల సంఖ్యలో వివాహాలు జరుగుతాయని ప్రముఖ పురోహితుడు పులుపుల ఫణికుమార్‌శర్మ తెలిపారు. ఈ నెల 21 తరువాత వచ్చే ఏడాది జనవరి 22వ తేదీ వరకు ముహూర్తాలకు వేచి చూడాల్సిందే. వచ్చే నెలలో 22, 26, 27, 28 తేదీల్లో వివాహ ముహూర్తాలు ఉన్నాయి. శుభకార్యాల సందడితో 20 నుంచి 25 రంగాల వారికి ఉపాధి లభించనుంది. చేతి నిండా పని దొరుకుతుందని పెళ్లిళ్లపై ఆధారపడి జీవనం సాగించే వారు ధీమా వ్యక్తం చేస్తున్నారు.