‘దళారుల మాటలు నమ్మి మోసపోవద్దు’

పరీక్ష కేంద్రం పరిశీలిస్తున్న ఎస్పీ ఆరిఫ్‌ హఫీజ్‌, అధికారులు

గుంటూరు నేరవార్తలు, న్యూస్‌టుడే : కానిస్టేబులు ఉద్యోగాలకు దరఖాస్తు చేసుకున్న అభ్యర్థులకు ఈనెల 22న రాతపరీక్ష నిర్వహణకు పటిష్ఠ బందోబస్తు ఏర్పాటు చేశామని జిల్లా ఎస్పీ ఆరిఫ్‌ హఫీజ్‌ తెలిపారు. శుక్రవారం నగరంలోని ఏసీ కళాశాల, జేకేసీ, మాజేటి గురవయ్య, బండ్లమూడి హనుమాయమ్మ తదితర కళాశాలల్లోని పరీక్ష కేంద్రాలను ఎస్పీ పరిశీలించారు. భద్రతాపరంగా తీసుకోవాల్సిన జాగ్రత్తలను అధికారులకు ఆదేశించారు. మౌలిక సదుపాయాలు ఏర్పాటు చేయాలన్నారు. ఈసందర్భంగా ఎస్పీ మాట్లాడుతూ జిల్లాలోని 44 కేంద్రాల్లో పరీక్షల నిర్వహణకు ఏర్పాట్లు చేశామన్నారు. మాల్‌ ప్రాక్టీస్‌, కాపీయింగ్‌ తదితర అక్రమాలకు తావు లేకుండా అన్ని చర్యలు తీసుకున్నామన్నారు. దళారులు, మాయగాళ్ల మాటలు నమ్మి ఎవరూ మోసపోవద్దన్నారు. అలాంటి వారిపై నిఘా పెట్టామన్నారు. ఆ తరహాలో ఎవరైనా దళారులు సంప్రదిస్తే స్థానిక పోలీసులకు తెలపాలన్నారు. ఎస్పీ వెంట ఆచార్యులు సిద్ధయ్య, ఏఎస్పీ అనిల్‌కుమార్‌, డీఎస్పీలు, సీఐలు ఉన్నారు.