రామాపురంలో ఉద్రిక్తత

క్షుద్రపూజలు చేస్తున్నాడనే అనుమానంతో గ్రామస్థుడ్ని నిలదీసిన ప్రజలు

ఊరిలోని రామాలయం వద్దకు చేరిన ప్రజలు

చీరాల అర్బన్‌, న్యూస్‌టుడే: క్షుద్రపూజలు చేస్తున్నాడనే అనుమానంతో గ్రామస్థులందరూ ఏకమై అదే గ్రామానికి చెందిన ఒక వ్యక్తిని నిలదీసిన సంఘటన బాపట్ల జిల్లా వేటపాలెం మండలంలోని రామాపురంలో గురువారం చోటుచేసుకుంది. దీంతో కొంతసేపు అక్కడ ఉద్రిక్త వాతావరణం నెలకొంది. గ్రామస్థుడు శేషగిరిరావు ఊరిలో ఏవో పూజలు చేస్తున్నాడని... ఇటీవల చేతిలో పసుపు, కుంకుమ తీసుకుని ఇంటింటికీ తిరిగాడని... ఆరోజు నుంచి గ్రామంలో పలువురు అస్వస్థతకు గురయ్యారని ప్రజల ఆరోపణ. ఈ నేపథ్యంలో అతడ్ని నిలదీసి గ్రామంలోని రామాలయం వద్దకు తీసుకెళ్లారు. విషయం తెలుసుకుని ఈపూరుపాలెం ఎస్సై జనార్దన్‌ అక్కడకు వెళ్లగా గ్రామంలోకి రాకుండా గ్రామస్థులు అడ్డుకున్నారు. విలేకర్లను రానీయలేదు. దీంతో గ్రామీణ సీఐ మల్లికార్జునరావు ఘటనా స్థలానికి చేరుకుని ప్రజలతో మాట్లాడారు. ఏదైనా ఉంటే పోలీసులకు ఫిర్యాదు చేయాలని... మీరు ఇలా చేయడం పద్ధతి కాదని చెప్పారు. గ్రామంలో ఏ ఘటన జరిగినా తొలుత పంచాయతీ వేయడం ఆనవాయితీ అని.. అంతేకాని ఇందులో వేరొకటి లేదని వారు పోలీసులకు వివరించారు.