భార్య పుట్టింటికి.. మనస్తాపంతో భర్త బలవన్మరణం

తంగిరాల సుబ్బరావు

ధేనువకొండ(అద్దంకి), న్యూస్‌టుడే: భార్య పుట్టింటికి వెళ్లిందనే మనస్తాపంతో భర్త ఉరేసుకుని బలవన్మరణం చెందిన సంఘటన శనివారం ఉదయం ధేనువకొండ పునరావాస కాలనీ(బలరామకృష్ణపురం)లో చోటుచేసుకుంది. ఎస్సై ఆర్‌.ఆదిలక్ష్మి అందించిన సమాచారం మేరకు.. పునరావాస కాలనీలో నివసించే తంగిరాల సుబ్బారావు (32), భార్య మధ్య మనస్పర్థలున్నాయి. ఈ నేపథ్యంలో ఆరు రోజుల క్రితం ఆమె జే పంగులూరు మండలం రామకూరులోని పుట్టింటికి వెళ్లింది. ఆమె వెళ్లిన నాటి నుంచి ముభావంగా ఉంటున్న సుబ్బారావు తీవ్ర మనస్తాపానికి గురయ్యాడు. శుక్రవారం రాత్రి 11 గంటల తరువాత ఇంట్లోని ఇనుప రాడ్డుకు చీరతో ఉరేసుకున్నాడు. తెల్లారిన తరువాత గుర్తించిన కుటుంబ సభ్యులు పరిశీలించగా అప్పటికే మృతిచెందినట్లు నిర్ధారించారు. ఆమేరకు మృతదేహానికి శవపంచనామా అనంతరం పోస్టుమార్టం నిమిత్తం అద్దంకి ప్రభుత్వ వైద్యశాలకు తరలించారు. మృతుడి ఇద్దరు కుమారులున్నారు. సోదరుడు మరియదాసు ఫిర్యాదు మేరకు కేసు నమోదు చేసినట్లు ఎస్సై తెలిపారు.