సీపీఎస్‌ రద్దు కోరుతూ సంకల్ప దీక్ష

సంకల్ప దీక్ష చేస్తున్న యూటీఎఫ్‌ నేతలు

బాపట్ల: అధికారంలోకి వచ్చిన వారం రోజుల్లో సీపీఎస్‌ విధానాన్ని రద్దు చేస్తామని హామీ ఇచ్చి అమలు చేయకుండా సీఎం వైఎస్‌ జగన్‌మోహన్‌రెడ్డి ఉద్యోగులను మోసం చేశారని జె.వినయ్‌కుమార్‌ అన్నారు. సీపీఎస్‌ రద్దు చేయాలని కోరుతూ స్థానిక యూటీఎఫ్‌ కార్యాలయంలో నేతలు ఆదివారం సంకల్పదీక్ష నిర్వహించారు. ఆయన మాట్లాడుతూ ఉద్యోగులు, ఉపాధ్యాయులపై ప్రభుత్వం నిరంకుశంగా వ్యవహరిస్తోందన్నారు. విజయవాడ సమీపంలోని ధర్మస్థలి వద్ద యూటీఎఫ్‌ దీక్షను పోలీసులు అడ్డుకుని నేతలను అరెస్టు చేయటాన్ని తీవ్రంగా ఖండిస్తున్నామన్నారు. సీపీఎస్‌ రద్దు చేసే వరకు పోరాటం కొనసాగుతుందన్నారు. పాత పింఛను విధానాన్ని అమలు చేయాలని డిమాండ్‌ చేశారు. సకాలంలో జీతాలు చెల్లించకుండా ప్రభుత్వం ఇబ్బందులు పెడుతోందన్నారు. ప్రతి నెలా 1నే ఉద్యోగులకు జీతాలు చెల్లించాలన్నారు. యూటీఎఫ్‌ నేతలు భిక్షాలుబాబు, హరిప్రియ, సురేష్‌, శాంతారావు, బాపయ్య, కోటేశ్వరరావు పాల్గొన్నారు.