జీఎంసీలో పీజీ సీట్ల పెంపు

ఉత్తర్వులను జాహ్నవికి అందజేస్తున్న పద్మావతిదేవి, పక్కన ఉమాజ్యోతి, పరమేశ్వరి

గుంటూరు వైద్యం, న్యూస్‌టుడే: గుంటూరు వైద్య కళాశాల సూక్ష్మజీవశాస్త్రం (మైక్రోబయాలజీ) విభాగంలో పీజీ సీట్లు పెంచుతూ జాతీయ వైద్య కమిషన్‌(ఎన్‌ఎంసీ) జారీ చేసిన ఉత్తర్వులు మంగళవారం కళాశాలకు అందాయి. ఆ విభాగంలో బోధనానిపుణులు, మౌలిక వసతులు ఉన్నందున ప్రస్తుతం ఉన్న 4 పీజీ సీట్ల నుంచి 9కి పెంచాలని ప్రిన్సిపల్‌ పద్మావతిదేవి ఎన్‌ఎంసీకి దరఖాస్తు చేశారు. దీంతో గతనెల 21న గుజరాత్‌ నుంచి ఆచార్య గౌరిశంకర్‌ ఆ విభాగాన్ని పరిశీలించి నివేదిక ఇచ్చారు. ఆయన ఇచ్చిన నివేదికను పరిశీలించిన ఎన్‌ఎంసీ కమిటీ సభ్యులు అదనంగా ఐదు సీట్లు పెంచేందుకు అనుమతి మంజూరు చేశారు. పీజీ సీట్లు పెంచుతూ ఎన్‌ఎంసీ ఇచ్చిన ఉత్తర్వులను ప్రిన్సిపల్‌ పద్మావతిదేవి ఆ విభాగం అధిపతి జాహ్నవికి అందజేశారు. కార్యక్రమంలో ఉప ప్రిన్సిపల్‌ ఉమాజ్యోతి, ఆచార్య పరమేశ్వరి పాల్గొన్నారు.