ఉరేసుకుని కౌలురైతు ఆత్మహత్య

కోటేశ్వరరావు (పాతచిత్రం)

గురజాల గ్రామీణ, న్యూస్‌టుడే: అప్పుల భారంతో కౌలు రైతు ఉరేసుకుని ఆత్మహత్యకు పాల్పడ్డాడు. పల్నాడు జిల్లా గురజాల మండలం గొట్టిముక్కల గ్రామంలో బుధవారం ఈ ఘటన జరిగింది. పోలీసులు తెలిపిన వివరాల మేరకు.. గ్రామానికి చెందిన సాగి కోటేశ్వరరావు(50) తన ఎకరం సొంత పొలంతో పాటు రెండేళ్ల నుంచి ఐదెకరాలు కౌలుకు తీసుకుని పండిస్తున్నారు. తెగుళ్లు, వర్షాలతో పంటలు దెబ్బతినడంతో సుమారు రూ.7లక్షల వరకు అప్పులయ్యాయి. ఈ నేపథ్యంలో బుధవారం ఉదయం తన భార్యకు పొలం వెళ్లొస్తానని చెప్పి ఇంటి నుంచి బయటకు వెళ్లాడు. గొట్టిముక్కల శివారులోని ముళ్ల పొదల్లో మధ్యాహ్నం ఉరేసుకుని ఉండటం చూసిన గొర్రెలకాపరి వెంటనే అతని కుటుంబ సభ్యులకు సమాచారం అందించాడు. బంధువులు వచ్చి చూడగా చనిపోయి వేలాడుతూ ఉన్నాడు. కోటేశ్వరరావు భార్య చెన్నమ్మ ఫిర్యాదు మేరకు కేసు నమోదు చేసి దర్యాప్తు చేస్తున్నట్లు పోలీసులు తెలిపారు.