అనిశా వలలో సర్వేయర్‌

రూ.26 వేలు లంచం తీసుకుంటుండగా పట్టుకున్న అధికారులు

లంచం సొమ్ముతో సీతా హేమంత్‌

కర్లపాలెం, న్యూస్‌టుడే: కర్లపాలెం మండల పరిధిలో బుధవారం ఓ సచివాలయ సర్వేయర్‌ లంచం తీసుకుంటుండగా అవినీతి నిరోధక శాఖ(అనిశా) అధికారులు దాడి చేసి పట్టుకున్న ఘటన స్థానికంగా చర్చనీయాంశమైంది. అనిశా డీఎస్పీ టీవీవీ ప్రతాప్‌కుమార్‌ తెలిపిన వివరాల మేరకు.. దుండివారిపాలెం గ్రామ సచివాలయ సర్వేయర్‌ సీతా హేమంత్‌ యాజలి సచివాలయ ఇన్‌ఛార్జి సర్వేయర్‌గా కూడా బాధ్యతలు నిర్వర్తిస్తున్నారు. కాకుమాను మండలం రేటూరుకు చెందిన వెంకయ్యకు యాజలి సచివాలయ పరిధిలో వ్యవసాయ భూమి ఉంది. పొలం సర్వే కోసం ఈనెల 21న దరఖాస్తు చేయగా సర్వేయర్‌ 24న సర్వే చేశారు. ఈనెల 25న వెంకయ్య ధ్రువపత్రం కోసం సర్వేయర్‌ను సంప్రదించగా రూ.26 వేలు లంచం డిమాండ్‌ చేశాడు. దీంతో బాధితుడు అంత నగదు చెల్లించుకోలేక అనిశా అధికారులను ఆశ్రయించాడు. వారి సూచనల మేరకు బాధితుడు సర్వేయర్‌కు రూ.26 వేలు లంచం ఇస్తుండగా సిబ్బందితో కలిసి బుధవారం దాడి చేసి పట్టుకున్నారు. నిందితుడిని విజయవాడ అనిశా కోర్టులో హాజరుపరుస్తామని డీఎస్పీ వివరించారు. ప్రభుత్వ అధికారులెవరైనా లంచం అడిగితే 14400 యాప్‌, స్పందన కాల్‌ సెంటరుకు ఫిర్యాదు చేస్తే వెంటనే చర్యలు తీసుకుంటామని సూచించారు. అనిశా సీఐలు రవిబాబు, నాగరాజు, అంజిబాబు, మన్మథరావు, ఎస్సై శ్రీనివాసమూర్తి పాల్గొన్నారు.

వివరాలు వెల్లడిస్తున్న అనిశా డీఎస్పీ ప్రతాప్‌కుమార్‌