రైలు ప్రమాదంలో యువకుడి దుర్మరణం

అభిషేక్‌ (పాతచిత్రం)

చీరాల నేరవిభాగం, న్యూస్‌టుడే: రైలు ప్రమాదంలో యువకుడు దుర్మరణం చెందిన ఘటన స్టూవార్టుపురం-బాపట్ల రైల్వేస్టేషన్‌ల మధ్య చోటుచేసుకుంది. జీఆర్పీ పోలీసులు తెలిపిన వివరాల ప్రకారం... మండలంలోని కావూరివారిపాలెం పంచాయతీ ఆంధ్రకేసరి నగర్‌కు చెందిన డి.ధనరాజ్‌, అవ్వమ్మ దంపతులకు అభిషేక్‌(25) ఒక్కగానొక్క కుమారుడు. ఇతను కొంతకాలంగా పెయింటింగ్‌ పనిచేస్తున్నాడు. ఈ క్రమంలో మంగళవారం రాత్రి పని ముగించుకుని ఇంటికి వెళ్లేందుకు స్థానిక రవిగార్డెన్స్‌ సమీపంలో పట్టాలు దాటుతుండగా రైలు ఢీకొని మృతిచెందాడు. సమాచారం అందుకున్న రైల్వే పోలీసులు బుధవారం ఘటనా స్థలానికి చేరుకున్నారు. మృతదేహానికి చీరాల ఏరియా ఆసుపత్రిలో శవపరీక్ష చేసి, కుటుంబ సభ్యులకు అప్పగించారు. చేతికందొచ్చిన కుమారుడు మృతిచెందటంతో కుటుంబ సభ్యులు, బంధువులు కన్నీరుమున్నీరయ్యారు.